Valentine’s Day hi a lo chhuah dan sawi dan chi hrang hrang a awm a, thu chiangkuang leh rintlak erawh a awm lo. Sawi dan a inang lo nual a chu an sawi inanglote zing atangin mi hriat lar leh sawi lar zual chi thumte chu kan hriat tawk leh thiam tawkin a tawi thei ang berin han tarlang i la.

Pakhatna:-Kum zabi 3-na lai vel khan Emperor Claudius II khan indona a sipai chak tak tak nei tur chuan in lama nupui fanau lungkham tur nei lo tlangval chauh a duh avangin a ram chhunga tlangval reng reng nupui neih phal a ni lo, tiin dan khauh tak a siam ta a ni. Chu dan chu hrereng chungin lainatna a khat puithiam Valentine chuan a rukin nupa tuak emawzat chu a lo inneihtir thin a, chu chu an hriatchhuah hnu in puithiam Valentine chu an man a, February 14 hian an tihlum ta a ni. Chu lainatna a khat puithiam Valentine hriatreng nan “Valentine day (Hmangaihna Ni)” tiin ni an serh hrang ta a ni.

Pahnihna :- Pope Gelasius I chuan AD 498 khan St Valentine-a pualin kut a buatsaih tan a. Kum zabi pali-na vel hian Rom ho chuan an pathian Lupercalia hming chawiin ni serh (kut) an hmang thin a ni. Chu an kut ni a thlen tak tak hma in an pathian Lupercalia-i nu Juno Februa (heihi inneihna siamsaktu an pathian a ni) hmingin ni serh an hmang hmasa phawt a ni. An kut ni a lo thlen chuan an pathian Lupercalia biak chu an tan chauh thin a ni. He an pathian biak an kut ni serh ni hi, February 13-15 a ni thin. Chu an kut ni ah chuan hmeichhia leh mipa hmun khata awm phal a ni lo. Mahse, an kut ni hnuhnung ber tlai lamah chuan, hmeichhia (nula ho) hming chu tlangvalte chuan ziak chhuakin thum an vawr thin a ni. Tlangvalte chuan an thum vawrna a an pawhfuh hming neitu nula chu kum khat chhung an awmpui thei a ni. Chumi kum khat chhung chuan an lo inhmangaih hman em em thin bawk a ni. He an kut ni Valentine’s day hi Pope Gelasius chuan Catholic Holiday ah a puang. Kum a lo rei zel a Pope Paul chuan 1969 khan Roman Calendar atangin he Valentine’s Day hi a paih bo ta a ni. Mahse a serh leh sang hman dan thil engkim chu phal a la ni tho a ni. Chuta tanga Valentine Day hi lo intan a ni, ti an awm bawk.

Pathumna:-Thawnthu anga an sawi dan chuan Valentine's day hi Rom Lal rama Kristian tlangval pakhat hming chawia lo intan a ni a. Kristian dangte ang bawkin Valentine-a pawh chu Krista a rin avangin tan inah hrehawm takin a tang ve a. Amah hmangaihtu, a ni pawhin a ngaih em em te chu nitin a ngaihtuah thin a, a dam thu leh a hmangaihna thu te chu nitina hriattir theih dan tur a ngaihtuah thian a. Atanna pindan tukverh atanga ban phak tawk velah hian thing pakhat a dinga, a hnah chu mihring thin pianhmang anga sawl mawi tak hi a ni a. Chu thing hnahah chuan 'i Valentine-a hi rawn hre reng ang che,' tiin a ziak a, a thian rinawm tak parvain a thlawhpui thin a. Nitinin 'Ka hmangaih che,' tih te chu a thawn chhuak ziah thin a; hetiang hian Valentine chu a lo intan ta a ni, tia sawi am awm bawk.

-----------------------------------------------------------------------------

----------------------------------------------------------------------------

Mihring tawngte leh vantirhkoh tawngtein thu sawi mah ila,hmangaihna ka neih si loh chuan dar, ri mai mai emaw, dar benthek, ri mai mai emaw ka lo ni ang.

Tin, thu hrilh theihna neiin, thuruk zawng zawng leh hriatna zawng zawng hre vek mah ila, tlang sawn theihna khawp hial rinna famkim nei mah ila, hmangaihna ka neih si loh chuan engmah ka ni lo vang.

Tin, mi retheite chawm nan ka sum zawng zawng pe vek mah ila, ka taksa pawh kang turin inpe mah ila, hmangaihna ka neih si loh chuan ka tan engmah a sawt lo vang.

Hmangaihnain a dawhthei a, ngil a nei bawk thin; hmangaihnain a itsik lo va; hmangaihna a infak lo va, a uang lo va, a che mawi lo lo va, mahni hma a sial lo va, a thinur duh lo va, sual lamah a ngaihtuah lo va; fel lohnaah a lawm lo va, thutak erawh chu a lawmpui thin a; engkim a tuar hram hram a, engkim a ring a, engkim a beisei a, engkim a tuar chhuak thin.

Hmangaihna hi engtikah mah a reh lo vang; amaherawhchu thu hrilhnate hi awm mah sela tihban a la ni ang a, tawng hriat lohte hi awm mah sela a la bang ang a, hriatna hi awm mah sela tihban a la ni ang.

Chutichuan, heng pathum, rinna te, beiseina te, hmangaihna te hi a awm reng ang; tin, hengahte hian a ropui ber chu hmangaihna hi a ni.