Vanglaini Feb. 21, 2012:-  US leh Britain chuan Israel sorkar chu Iran nuclear hmunte bei lo turin an ngen.

Pathianni khan US joint chief of staff, Gen Martin Dempsy leh Britain Foreign William Hague chuan Israel-in Iran hi a bei a nih chuan, middle east bial pumah nghawng tha lo tak a nei dawn niin an sawi. Khawvel ram dangte Iran nuclear program titawp tura nawr a, hrekna na zawk an pek theihna tura hun pe turin Israel chu an ngen a ni.

Iran-in nuclear program a kalpui mek chu nuclear ralthuam siamna atana ti niin khawthlang ram hrang hrangten an sawi a,titawp turin an nawr mek a ni. Iran sawisel nasa ber zingah hian Israel leh US pawh an tel a. Mahse Iran chuan nuclear ralthuam siamna tur a ni lo tiin a la tang reng thung.

US leh European Union chuan Iran oil sector hrekna na zawk a siam a, he hrekna hi hman nghal tura tih a ni. Oil sector hi Iran sum hmuhna hnar pawimawh tak a nih avangin, hemi hmanga hrek a nih chuan Iran pawh hi nawr hlawhtlin theih an inbeisei a ni.

Pathianni khan Iran chuan Britain leh France company-te hnena oil a hralh thin chu tihtawp a nih thu a puang. Iran oil ministry thupuangtu, Alireza Nikzad-Rahbar chuan oil hralhchhuahna lamah buaina an neih lohthu leh, company dang an pek tur pawh an ngaihtuah vek tawh thu a sawi.

Hetihlai hian Israel sipai hotu,Lieutenant General Benny Gantz chuan Iran beih leh beih loh chungchangah, Israel chuan ama thu ngeiin thutlukna a siam dawn a ni a ti. 'Iran leh a nuclear project kalpui dante chu uluk takin kan thlithlai reng dawn a ni' a ti