1945 October 27 khan Pernambuco State a thingtlang khaw pakhat-ah lo lam kut hanthawk a eizawng chhungkaw rethei tak pakhat chuan fapa duhawm tak an hring ta a ni. An chhungkaw retheih luatna avangin chu an fapa chuan kum 4 mi a nih atangin kawngsir ah  Badam (Pea-nut) zuarin a theihtawkin pawisa a zawng tan tawh a ni. Chutianga theih tawk a pawisa a zawn pawh in, chaw dik tak leh puar khawp a ei tur an nei chuang lova, thawmhnaw haktur mumal pawh a nei chuang bawk hek lo.

School kal thei rual a lo nih in, zirna run chu a bel ve tan ta a. An school chawlh chhung takngial ah pawh awmawl mai mai hman lovin a thian pahnih nen mi pheikhawk nawt faiin an school kal man tur pawisa chu theih tawkin an zawng ve tang tang thin a ni.

Kum 12 mi a lo nih in, ni khat chu dawrneitu mihausa pakhat hi a thiante pahnih nen an awmna lamah pheikhawk nawhfai tir turin a lo kal a. An pathum chuan chu dawrnei mihausa pa pheikhawh nawt turin beiseina mitmeng nen an lo en a. Mahse, an thin dun pathum zingah chu mihausa pa pheikhawk chu tu berin nge nawt ang tih an inhre thei lo. An pathum chuan tawng chhuak chiah lo mahse, an rilru chhung chuan an inchuh (an inhuphurh tawn) a ni ber mai. Inthlahrung leh beiseina mitmeng nen mihausa pa chu a en reng a. Dawrnei mihausa chuan an phathum zingah tunnge a tirh ang tih chu an nghak reng a. Dawrnei mihausa pa pawh chuan a tihngaihna a hre bik hauh lo a ni. A tawpah chuan mihausa pa chuan "Tuinnge pawisa mamawh ber le, tunge ka pheikhawk nawtfai ang le" ti phah in pawisa thir cheng hnih chu a han phawrh chhuak ta. 

Pawisa thir cheng hnih an han hmuh meuh chuan, an thian dun pathum rilru chu a danglam vek ngeiin a rinawm. Chu pawisa thir cheng hnih an han hmu chu an lawm tlang bawk si, an inhuphurh tawn bawk si. Ni danga pheikhawk pakhat an nawh a an hmuh zat a let sawm vel a nih a vangin, an mitmeng pawh a danglam vek tawh a ni.

An thian pakhat chuan "Kei hi zing atanga engmah la ei lo ka ni a, eina tur pawisa theihtawkin ka zawng a ka la hmu lo. Tlailam chaw eina tur pawh ka nei lo, tuna mi tal ka nawh loh chuan ka thi tak ngial dawn" tiin a sawi chhuak a.

Chutia an thian pakhatin a dinhmun a han sawi chhuah takah chuan, an thian pakhat pawh chuan awm mai mai thei lovin, "Kan in-a eitur kan neih lohna ni thum a ni tawh. Ka nu dam lovin a mu reng a engmah a thawk thei lo. Ka nu dam lo tan eitur engemaw tal ka hawn loh chuan a ni thei lo. Kei a riltam chu a pawi lova, ka nu damlo riltam hmel hmuh hi ka tan a hrehawm lutuk. Engmah hawn lova in ka haw chuan ka nu'n min lo vaw dawn" tiin an harsatna mittui nen a sawi chhuak a.

A thiante pahnih in an harsatna an sawi a ngaihthlak zawh chuan chu naupang chuan, dawrnei mihausa pa kut chhunga pawisa thir cheng hnih chu a en vawng vawng a, engmah sawi chhuak mai thei lo chuan thil a ngaihtuah ta a. Dawrnei mihausa pa chuan chu naupang hneh-ah chuan, "Nang engnge i harsatna? engnge sawi tur i neih?" tiin a zawt a.

A tawpah chuan chu naupang chuan hawihhawm takin "Ka pu, i pheikhawk chu keiman ka nawtfai ang. Khawngaih in chu chu remti hram rawh. Hemite pahnih hi ka thian thaber-te an  ni. Ka thian pakhat hi zing atanga engmah ei lo a nih avangin a chau hle tawh a ni. Ka thian pakhat lah hi, a chaw ei lohna ni thum a ni tawh a, i pheikhawk nawtfai turin chakna a nei tawh in ka ring lo. Kei chu zingah Badam (Pea-nut) tlem ka ei tawh a, kei hi ka thiante pahnih zingah chuan thawk tur awm ber ka ni. Mahse, ka pheikhawk nawh faiman cheng hnih erawh ka thiante henah cheng khat ve ve in ka pe ang. Ka thiante pahnih in an dawn chuan ka dawn ang a ni e" a ti a.

Chu naupang tawngkam avang chuan dawrnei mihausa pa pawh chu a mangang em em a, a rilru leh ngaihtuahna lam thlengin a danglam vek thei a ni. A tawpah chuan, chu naupang chu a nawh fai tir a, pawisa cheng hnih chu a pe ta a ni. Chu naupang pawh chuan pawisa a dawn ve leh, a thiante pahnih chu hlim leh lawm takin cheng khat ve ve in a pe nghal a ni. A man engmah chang ve lo mahse, a hlim hmel leh lawm hmel chuan dawrnei mihausa pa rilru chu a khawi em em mai a ni.

Ni rei lo te ah chuan dawrnei mihausa pa chuan chu naupang chu a rawn zawng leh a, an school chawlh a hun awl neih chhung chu a dawra thawk tuin a va sawm thin a ni. A dawr-a hna a thawhtir mai bakah zanriah pawh a ei tir nghal law law thin a ni. He dawra a thawh hi pawisa la lut tam viau lo mahse, mi pheikhawk nawhfai ai chuan a tha in a hlawk hle zawk a ni. Heti anga dawr pakhat a thawktu a lo nih theih na chhan hi, mahni aia harsate a tanpui vang leh thiante chunga a tlawmngaihna leh rinawmna rah a ni, tiih hi a hrereng bawk a ni. Chuvangin mi harsa leh tanpui ngaite a hmuh a piangin a theih tawkin a tanpui zel thin bawk a ni.

A tawpah chuan zirna lam chawlsan in hna lamah theihtawkin tan a la ta zawk a ni. A hnathawhna hmunah pawh hnathawktute chanvo leh hamthatna dik taka an chan theih nana theih tawka hmalatu a ni. Kum 21 mi a nih in hnathawk pawl pakhatah a lut a, kum 45 mi a nih in Worker's Party a din ta a ni.

An ram mipuite harsatna leh an rama ei leh in a hrasatna chuan a rilruah thu a sawi na em em thin a, Kum 2002 October thla atangin "He rama awm te hian ni khat-ah chaw vawi thum in ei thei tawh ang" tih thupui hmangin an ram inthlanpui ah a tel ve ta a ni. Mipuite ngainat leh lawm pawh a hlawh em em a, an ram President a vawi 35 na chu a lo ni ta a ni. Amah hi, an ram history a mi rethei rim taka hnathawktu dinhmun atanga President rawn ni chhau awmchhun chu a ni. 2006 kum-ah an ram President a vawi hnihna a tana thlantlin a ni leh bawk.

President nihna atanga an ram kum 8 chhung a han kaihruai tak tak mai chu, an ram-in hma a sawn hle a ni. An ram mipuite tana a thiltum ropui tak "He rama awm te hian ni khat-ah chaw vawi thum in ei thei tawh ang" tih a authawm ropui tak tihhlawhtlin tumin theihtawkin tan a la a, an ram chhung a naupang 93% leh puitling 83% te chuan ni khat-ah chaw vawithum an ei thei ngei bawk a ni. A kaihhruaina hnuai ah an ram chu khawvel a sumdawnna hmun pui ber number 10 nihna ah a hlangkai thei ta a ni.

Chu chu tudang a ni love, 2010 kum tawp a, Brazil president nihna chawlhsantu President Luiz Inacio Lula da Silva ngei chu a ni.

I hringnun ah engtikah mah beidawng reng reng suh, mi dangte pawh tumah hnawl mai suh.

Vervek taka mahni tanghma haina chuan, mi dangte malsawmna a thlen letling zawk thin.

Mi dangte i tanpuina atangin i hriat loh karah pathian i ni thei bawk.

Mi dang i tanpui a, i ngaihsak thinna chuan i lungngaihna leh beidawnna pawh a chawk zangkhai thin a ni, tih hi hrereng bawk ang che. (Dalai Lama)