Pathianni tlai apiangin Pastor leh a fapa kum 11 mi te chuan Bible Track semin khaw chhung an fang ziah thin a, hun rei tak chhung chu hetiang hian an lo ti tawh a ni. Ni khat chu an vah chhuah hun a lo thleng leh ta a. Chumi tlai chuan ruah a sur nasain khua lah chu a vawt tuk mai bawk si a, mahni in luma awm nana itawm tak a ni. Naupang chuan,"Ka Pa, ka inthuam lum tawk tawh e. Ka inpeih a ni mai," a han ti a.

Pastor chuan, "Eng turin maw?" tiin a zawt let a. Naupang chuan, "Ele, Bible Track kan sem hun ania lawm. Kal ka inpeih tawh e," a ti a. A pa chuan,"Bawiha, vawiin tlai chu kan chawl mai dawn em ni? Khua a chhe si a, a tihchi loh ang," a ti a. Naupangte chuan mak ti hmel deuh hian,"Mahse....ka pa, khawchhiat avang hian Hremhmun an kal loh phah dawn chuang hleinem. I peih ve loh chuan keimaha ka sem min phalsak mai ta che," tiin a hnial ve tlat reuh a. Pastor chuan a inngaihtuah vang vang hnuah a fapa kal chu a remti a.

Bible Track semin naupangte chu khawchhungah chuan a kual a kual a. Ruahin a nan huh vek tawh a, khawlaiah mihring an tlem avang chuan nidang zawng aiin sem zawh a har bawk a. Vawt ti em emin a kal khur hlek hlek tawh a, a sem bang pakhat hi a keng khur beuh beuh mai a ni. Naupang chuan a Track ken chhuah chu sem zawh ngei a duh bawk si a, a dinna bula In hlui tawh tak maia mite chu pek mai a rilruk ta a.

Tichuan, kawngka chu a han kik a. Tumahin an chhang lo. Beidawng duh chuang lovin, a kik nawn chhen maia. Mahse, tumahin an rawn hawng thei bawk si lo. Rei ngial a beih hnu pawha an hawn tak loh avang chuan kalsawn a tum a. Chutihlai tak chuan, kawngka chu zawimuang hian a rawn inhawng a, nu upa lam, lungngaih hmel em em mai hi a lo ding ran mai a. Naupang hnenah chuan,"Mama, enge tihsak theih che ka neih?" tiin a han zawt a. Naupang chuan,"Ka rawn tibuai che niin ka inhria a, a pawi ka ti khawp mai.'Lal Isuan a hmangaih che a ni' tih thu hrilh tur che leh he Bible Track pe tur che hian ka lo kal a ni," tih pahin a thil sem bang awm chhun chu a pe a, a hawsan ta a.

Pathianni a lo her chhuak leh a, chawhma inkhawm hunah Pastor chuana hun a hmang zo a. Thusawi duh nei apiang tana hun a han hawn chuan, tlar hnung lam atang hian nu upa lam pakhat hi a rawn pen chhuak a. Bianga mittui luang zung zungin he thu hi a sawi ta a.

"He hmunah hian min hmu ngai lo vang a, tumahin min hre hek lo vang. Lal isua hi ka hre ngai lo va, pasal sun ka ni a, fa ka nei bawk si lo va khawhar em emin ka hringnun hi ka hmang thin a ni. Kan hriat angin Pathianni kalta kha khua a chhiain a vawt em em mai a. Khangte khan ka lungngaihna a ti zual a ni ta ve ang, dam zui reng ka peih ta lo va, intihhlum ka tum ta a ni. Inchungah inawhhlumna tur ka siam a, ka nghawngah hruizen pawh ka bat fel diam tawh. Chutih lai tak chuan inhnuai kawngka hi an rawn kik dat dat a. Chu chuan ka ngaihtuahna tlemin a la peng hret a. Hawnsak pawh ka tum chuang lo. An kalsawn veleh ka dinna thutthleng chu pheh thluk ka tum a ni.

Mahse, an rawn kik leh thin a. An kik ring tual tual mai bawk si a,'Khawilam mi nge maw ni teh reng ni. Tlawhtu nei ngai lo khan tun ang khawvawt hnuaiah lehnghal' ti nauh nauh chungin kawngka hawn tur chuan ka chhuk ta a. Kawngka ka han hawn chuan naupangte hi huh vekin a lo ding khur hlak hlak a. Kei chuan chu naupang chu 'Angel naupang' tiin ka sawi kumkhua tawh ang. Ani chuan, min hmuh veleh 'Lal Isua'n a hmangaih che' min han ti a. Bible Track hi min pe bawk a. Tichuan, a kal leh ta mai a.

A lehkha min pek chu ka chhiar zui ta a, intihhlum tum mek khan nun thar ka chhar phah ta hlauh a ni. Tunah chuan mi thar ka ni tawh a, Lal Isua neitu ka lo ni ta. Bible Track hnunga inziak Address chhuiin he Biak In hi ka rawn thleng ta a ni," tiin. Ngaithlatu zingah mittui tla lo reng an awm lo.

Pastor pawh chu lungchhiat avanga inhnit hlawp hlawp chungin pulpit atang chuan a rawn chhuk a. Tlar hmasa bera thu, a fapa "Angel naupang" chu a kuah ta ngawih ngawih a.

Source:- Electric Veng KTP