(Hei le, nizan mumiah lo in ka thawthu te ka rawn ziak  chhunzawm ta hrama. A tawp dan hian lung a ti awi chiah lo maithei a, mahse thlahrang lampang ka chhiar thinte hi a tawp dan inang put a nih thin avangin tlema dangdai deuh tih ka tum ta a nih hi. A awmang lo viau a nih leh a dang ziah hunah ending dang kan hmang leh turah ngai ang. Enge ni na vei, inzir mek kan nia lawm maw le!) Kan Thupui pakhat eraw kala ziakzawm thei rih lo a ni. Hun ka neitlem ve ema. minlo hrethiam raw u.!!! theitawpin ziakin karawn la hluih dawn che u nia.
          Tichuan, thukhawchang sawi chung zelin chak takin kan tlan zel a. Ruah lah chu a sur duhin khawpui ri dur dur reng chuan awm a ti nuam lo hle mai bawk a. Kawl a phe zuai zuai reng bawk a, ka huh zawr hneh em avangin khaw chhung thlena intihlum thuai thuai ka chak kher mai.
          Khaw chhung luh nan mel chanve lo liam a awm tawh lovang tih ah chuan vanduaithlak takin kan chuanna motor ke chu a thep leh ta nghal a. Rang taka zuang chhuakin a chhiat dante chu kan enfel zung zung a. Driver chuan a ke spare a hnunga a dah avangin lungngai lo turin min ti a, a ke thep a herh thlawn lai chuan kei chu a ke spare la turin motor hnung lamah chuan ka phei nghal bawk a.
          Chutah le! Motor hnung lam thingrem ka han hawng chiah chu a chhungah chuan ka nupui Emily a lo mu reng mai a. A hmel chu rapawm khawpin a dang a, nui sung chungin min lo ban leh ta nghal a.
          Ka te thawt a, rang takin ka tawlh let vat a. Ka thawmah chuan driver chu a rawn tlan phei thuai a. Kei chuan engmah sawi lovin motor hnung chu ka kawk ringawt a, chubak chu engmah tih theih ka nei lo. Ka kha a chih a, ka khup chu a sai ngar ngar mai bawk nen. Mahse, a va en ve nak chuan engmah alo awm leh silo. Mak ka ti em em mai a. Nichin lawk kha chuan a awm chiang hle kha a ni si a. Tichuan motor ke te chu kan thlak fel hnu chuan kan tlan leh ta a. Kalkawngah chuan thil danglam engmah tawk tawh lovin khua chu kan lut ta a.
          Khua kan thlen chuan rang takin in lam ka pan ding nghal a. Kan in chu enkawltu awm lo tih hriat takin a chul rup a. Inchhung ka han lut chu engkim mai chu a ngai ngaiin a lo la awm a, ka thu hnawk a, ka lung a lengin Emily ka mitthla zawng ringawt pawh chuan ka biangah chuan mittui a luang zawih zawih hial a. Chutia lungleng taka ka indawm kun lai chuan thawklehkhatah ka nghawng a rawn hit chuai a, vur tuia rei tak chiah hnu a min rawn khawih leh ni mai hian ka hria. Ka han hawi chhuak a, Emily alo ni reng mai!
          Ka en reng a, lunglenna in min chiah hneh em avangin hlauh enah pawh ka en tawh lo. Min kalsan leh mawlh ka hlau a ni ber mai. Thei leh thei lovin ka ban tawk tawk a, mahse pawn lamah thawm a awm avangin boruakah a thamral leh ta. Hmuh tur a awm leh ta lo. Chumi zan chuan mut har ka ti kher mai. Khumah chuan ka let ka let a. Pawn lamah chuan thli a thaw vuk vuk a, ui bauh ri chu vengthlang lamah a inchhawn thla thliai thliai bawk a. Thawklehkhatah ka pindan kawngkhar chu a rawn inhawng thuai a, Emily chuan a var veka inthuamin, lungngaih hmel takin alo lut a, ka en reng lai chuan aw ka hriat azawnga aw rapthlak ber mai hmangin a rawn tawngchhuak ta a.
          "He khawvelah hian hmabak neiin I inhria em? Min thattu chungah chuan keiman phuba ka la tawh. I tan tihtur a awm tawh lo. Min rawn zui ve nghal mai rawh, ka kalna ah rawn kal ve mai rawh." a rawn ti a. Muangchangin a ral ta riai riai a.
          Khua a var tan ek ek a, Emily rawn lan leh beiseiin ka ring ka fan ka fan a, mahse hmuh tur reng a awm si lo. Ka tahna mitte chu a bui zo tawh a, ka kolet thei tawh si lo. Tunge heti taka kan chhungkua nghaisa tu hi ni ang a? Tunge ka Emily nunna chhat tu chu ni ang? Ka neih zawng zawng min laksak a, he khawvelah hian engmah hmachhuan tur pawh ka neih tak loh hi! Aw Emily! Ka thinlungah I thamral lo asin! Kan hlimlainite kha a thamral mawlh lo.#
    
                                                                                                                  Tv- Manasse