• 'HISTORY OF MIZO IN BURMA (by B.Lalthangliana)' THLIRNA By - L. Keivom

    Mizo history hi thawnthu ziaha an ziak thin avangin Mizo History ziaktu tam zawk hian a kum lam pang hi an uar lo hle a. An zinga huaisen ber chu 'History of Mizo in Burma' tih ziaktu B. Lalthangliana hi a ni awm e. A ni chuan tun hma kum 2000 velah Zofate hi China ram hmar thlang, Tibet ram hmar chhaka awm Kansu bial Tao lui kam velah a chentir a. Kum zabi 7-na A.D khan Burma ramah a tawlh luhtir a; Kum zabi 8-naah Kabaw phai kuam a hruai thleng a, Manipur leh Burma rama Kanu-hote a um chhuahtir hnuin, kum zabi 9-na laihawl leh 13-na hnukhawi thlengin Khampatah a chentir bawk a. Kum zabi 14-na hun hmasa lam khan Shan ral avangin Kabaw phaikuam a chhuahtir a. Chin ramah a hruai chho va, kum zabi 15-17 inkar khan Thantlang chuan khumin Run lui kam velah an khawsa a, chuta tangin Lentlang an chuang chhuak a, Tiau lui kam an thleng a. A.D 1700 khan Mizoram a hruai thleng ta a ni. Chutah chuan le, A.D 1740 vel khan Tiau kam atanga mel sawmthum velah Sailo lal pariat lai kha Pawi ral hlauh avangin Selesih hmunah an inchhung khawm a, "In 7000 chuang an tling awm e" a ti. Mizo history a chhui kha Tualte vanglai thawnthuah a khalh lut ta a ni.

    Selesih thawnthu hian Tualte vanglai thawnthute hi a khm loh pawhin, chen chu a chen chiang a ni. Selesih in 7000 lai an nih thu hi kan historian intiho hian an chhuang viau a ni ang, chaw tak khawrhin an khawrh tlat mai a. 'Khawbung a la ti ta deuh deuh' tih angin 'Ka Ram leh Kei' tih ziaktu R.Vanlawma phei chuan,"Selesih hi khaw khat mah ni sela, Saptawnga Confederation an tih ang chia awm an ni a" a la ti ta deuh deuh a!

    Selesih thawnthu hi ngaihruatnaah chuan thil awm thei a ni a, mahse a hun azirin thil ni thei a ni lo. An pawm dan ang hi lo pawm dawn ta ang ni ila, in tinah dan naranin mi panga zel awm turah dah ta bawk ila, Selesihah hian a tlem berah Mihring 35,000 an awm a ngai a ni. Chutiang zah zah khaw khata mihring inbeng khawm tur an la awm lo. B.Lalthangliana zeldinna kum A.D 1740 hi dik angin lo pawm ta ila chuan, chhiarpui hmasa ber 1901 khan Mizoramah mihring 78,478 chauh an awm lo ang. Kabaw phai kuamah phei chuan 1901 chhiarpui khan mihring 18,068 lek an awm a ni. B.Lalthangliana cencus ah chuan 1972-1973 khan Kawlrama Mizo(Chin) zawng zawng chu 33554 lek an ni a; kum 232 kal taa Selesih mihring zat tur awm pawh an la tling lo a ni. In 7000 hunna turin Selesihah hian hmun leh hma a awm lova, a mihring chawmna tur ram pawh a awm lo leh zual. Kumtinin lo sangruk chauh pawh lo vat dawn se, kilometer khat chu kilometer 1000 a ni dawn a ni. Thlawhtheihna an hman loh chuan hna an thawk hman lo ang.


    'Zukhawn chang lo titi'(Thu leh Hla,Jan-Feb 1982 issue)a ziakah chuan C. Chhuanvawra'n, "Selesiha Sailoho an awm lai hian an kiang lawk Durtlangah 7000 an awm si a, sangsarih khua hun khatah inhnaiteah an awm a rinawm lo a ni. Tin, Selesih khua hi upa thenkhat chuan zasarih khua an ti ve tlat bawk" a ti a. Khang hun lai atan khan in zasarih khua pawh hi thil awm ang vak a ni lo. Manipur rama khaw lian bera an record, Senvon khua pawh hi in zathum aiin a tlem zawk. Chuvangin, Selesih thawnthu hi thu dik bawmah kan khung dawn chuan a leng tawk tura kan rem that a ngai ang.


    Zoram Khawvel by L.Keivom
    Second Edition, 1994
    Lenchhawn Press

    Facebook comments