• KRISTIAN BOXER ROPUI MANNY PACQUIAO-A'N MIRETHEI CHANHAI TE TAN IN 1,000 SAK SAK

    Boxer hlawhtling leh ropui anih piah lama 'mi entawntlak', Kristian piangthar țha tak anih avanga Mizote pawhin kan țan rawn, boxing khawvel a chawlhsan hnua politics a zuangluta 'senator' ni chho ta rup Manny Pacquiao-a chuan, a ram Philippines-a a chawrchhuahna khua-a chhungkaw rethei pachhe tak tak te thlamuang leh ngaihngam taka an inbengbel na tur leh 'ka in' tih tur an neih ve theihna turin, sawrkar sum nilo, ama mimal sum ațang liau liau-in chenna in 1,000 tehmeuh mai a sak sak rup a ni.
    .
    Kum 37 mi Isua hnungzuitu rinawm tak chuan a facebook page ah tihian post zuiin, "Ka bial Sarangani Province tan ka mimal sum ațanga hetia in ka pe thei hi ka lawm takzet a, he hamthatna dawngtu hi chhungkaw sang chuang anni"
    .
    "A khawngaihna zarah kawng hrâng hrânga a thilpek kawltu rinawm kan nih țheuh angin, mitinin kan thilpek dawnte chu midang țanpui na'n kan hmang chhuak tur a ni"
    .
    "Ka la sak belh zel dawn, a chhan chu kan Bible-in ringtute chu vuivai lova inchhawmdawl tawn turin min zirtir a ni" a ti.
    .
    A in sakna atana a cheng maktaduai tam tak senral-ah hian, 'fight of the century' an tih hial, 2015 kuma Floyd Mayweather nen an innuaina, kha fight ropui tak ațanga a sum hlawh engemawzat tela rin a ni a, kha match ah khân chaklo mahse sum maktaduai tam tak a hailut tho a ni.
    .
    A paltlang tawh avanga retheih leh rilțam awmzia hrechiang ęm ęm tu, a hming lema Pac-Man an tih bawk hian, hamțhatna(in) dawngtute chu amah nilovin Pathian hnenah lawmthu hrilh zawk turin a chah a, amah chu Pathian hmanraw tlawm tak ve mai chauh anih thu a sawi. Tihian sawiin, "Vawiina in thil dawn avang hian Pathian hnenah lawmthu sawi rawh u. Ama thilpek liau liau che u a ni. Kei chu nangmahni țanpui na'na a hmanrua ve mai chauh ka ni. Țha takin enkawl ula, hralh/tiral miah suh ang che u" tiin a chah a ni.
    .
    Retheihna leh harsatna tinreng hmachhawna, hlawhtlinna sualchhuaka, boxer leh politician hausa tawntaw ni chho ta, pa ropui inngaitlawm tak Pacquiao-a hi 'Greatest Asian boxer' leh 'Best pound for pound fighter in the world' ti-a boxing expert te'n an sawi a ni a, khawvel boxer piang tawha la ropui ber titu pawl pawh an awm hial a, 2015 kum khân khawvel athlete hlawh sang ber dawttu a ni pha nghe nghe.
    .
    Mahse a ropuina, hausakna, larna leh hlawhtlinna zozai te chu Pathian hlat phah na'n te, chapo uanthuan na'n te, nawmsipbawl na'n te leh a nihna tlawm tak theihngilh phah na'n te a hmang ngai lo. "Ka chawrchhuahna hi engtikahmah ka theihngilh ngai lovang. Midang țanpui min phalsak avangin Pathian hnenah lawmthu ka sawi țhin" a ti.
    .
    Pathian hnen ațanga a sumpai malsawmna dawn chu phal takin mi harsate țanpui na'n a hmangchhuak țhina, infiammi anih lai ațang tawhin 'philanthropist' (neih ui lova mipui rawngbawltu) ti-a hriat lar a ni. Boxing a khelh lai khân, a inhnek apiangin GenSan khawpuia damdawi in pakhat țanpui na'n pesos maktaduai khat a pe ziah țhina, chu damdawi ina a thilpek zar zotu, a kal hlawhtling taka thlaksak damlo pakhat chuan, mipuite'n a thil țha tih ropui tak chu an lo hriat theih na'na election huna campaign sak Pacquiao chu a dil ta rŕwih a, mahse Pacquiao-a chuan lo hnial fithla in, politician a nihna leh mipui rawngbawltu a nihna chuan inzawmna a neih loh thu a lo hrilh a ni.
    Joseph Lr Chhangte

    copy - mizo world news

    Facebook comments