• Master of Business Administration (MBA) Hi Engnge Ni?

    By:- Dr. Sui Reng Liana

    Tunlai kan ram Politics inthlak danglam vel hian nghawng a nei nasa em em a. Mitin te rilruah beiseina a sangin thalaite mahni theih tawk tawkin an inbuatsaih nasa hle bawk.
    A bikin Business lam zirnaah inthlansiakna a na sawt hle. Tunhma kum 2-3 kal ta vel khan hnaneitu (Employer) in hnathawktu (Employee) a thlang zawk thin a, tunah erawh hnathawktuin a thawh duhna thlang thei dinhmunah a ding ta zawk tlat mai le. Chutiang dinhmun ding ve thei tur chuan zofa thalaite kan inbuatsaih a tul ve hle dawn a ni. Skill employee turin experience chauh ni lo zirna lama kan tlan ve a tul ta. Inbuatsaih tur tam tak zinga mi tam zawkte inbuatsaihna chu Business lam zirna run a pen luh hi a ni. Business lam zirna ah MBA zir hi thlalaite duh thlan anih ang bawkin hnalatu (Recruiter) te duhthusam pawh a ni. MBA zir tur ten kan hriat atan pawimawh zual deuh te a hnuaia mi ang hian ka han chhawpchhuak ve a. MBA zirtur ten kan hriat tura pawimawh ber chu zir man a to-in, sum seng a tam a, hun pawh a hek a, hun pek a tul hle tih hi a ni. Tin, zir ngawrh a ngai in, chakna/tha tam tak seng a tul avangin zir hmaa ngaihtuah chian hle a tha.

    Master of Business Administration (MBA) hi business management lama Master degree a nia, academic ni lovin practical a hmangtu te tana buatsaih Professional Degree a ni. Full time MBA, hnathawk paha zir theih Part-time MBA leh kum upa lam deuh leh experience duhthawh deuh te tan zir theih Executive MBA tia zir theiha buatsaih a ni tlangpui thin. Online MBA te pawh a awm ve bawk. University thenkhatah M.Sc (International Business) tiin business lam zirna buatsaihin, MBA zir ai sum hautak dan a ziaawm deuh bawk.


    Enge an zir?
    MBA zirlai hi business management lam subject pawimawhte khaikhawma zirtura buatsaih a ni. Marketing Management, Human Resource Management, Financial Management, Project Management leh Management Information System subject te an zir ngei bawk. Tichuan, MBA hi General MBA leh Specialized MBA tia zir theiha buatsaih a ni a, an zir subject-te tlemin a danglam deuh thin. University pakhat leh pakhat subject zirtir leh subject zir tam dan a inang lo deuh nuaihin, a tlangpui thuin Core course subject 8-12 zir zo ngei a tul. MBA degree hmu turin thla 18 atangin thla 24 thleng inbuatsaih a tul a ni. MBA zir tur chuan Accounting lam emaw Finance lam emaw Statistics lam knowledge nei ngei ni thei se, tichuan an zirlai ah harsatna em em an neilo deuh thin. Statistical lam knowledge neilo te tan harsatna a thuah hnih duh hle. MBA Degree hmu tur hian Course work zawh hnuah Research paper buatsaih ngei tura phut an ni. Research /Thesis hi word 15000-20000 vela ziak tura beisei an ni a, Thesis an ziah zawh hnuah an thuziak (Thesis)-ah an chiang tawk em tih Professor 3 hmaah exam (Oral Defense) neiin, chu exam (Oral Defense)-a Examiner (Professor) 3 ten lungrual taka an pass tir hnuah chauh MBA degree hi hlan an ni.


    Tute tan nge?
    Company emaw, Organization-a department hrang hrang kaihruaitu (Manager)-te leh nihna sang zawk beisei te’n department hrang hranga thawktute nen lungrual taka thawhho theih leh department te tha zawka kaihruai thei tura inbuatsaihte’n an zir thin. Economics leh Management lam zirna background neih kher a ngai lova, graduate tawh phawt tan zir theih a ni. A bikin Medical doctor te, Engineer te leh Technology lama degree neite’n management level-a nihna (position) sang zawk beisei a inbuatsaihna atan MBA hi an zir chawk. International company tam takin an hnathawktute, hnathawktu tha leh management thiam an nih beiseiin sum tam tak sengin MBA an zirtir thin a, private business thawk mek te leh thawh tum te tan management hi a pawimawh em avang hian MBA hi zir ngei a tha.


    Engtia zir theih nge?
    University-a MBA admission hmutura requirement hi kan zir duhna University zirin a in ang lo thei. Sap tawng thiam a pawimawh hmasain, International University tam zawkin TOEFL/IELTS score an phut a, an nei lo anih chuan Univesity buatsaih English test an chhan tir ngei a ni. U.S University tam zawkin GMAT (Graduate Management Admission/ Aptitute Test) score an phut laiin UK Universtity tam zawkah erawh chuan GMAT score thil tel hi a ngai kher lo thin. GMAT exam hi English, Maths, Logic lam test a ni. Tichuan, MBA hi Dgeree nei tawh phawt tan zir theih a nia, Economics/ Business/ Management deploma neih a tul kher lova, a tul chuan Pre-MBA course an lak tir mai. MBA zir man hi a tlem lem lova, thenkhat chuan MBA zir hmain Diploma course an la thin. MBA zirtur chuan experience nei ngei tur a ni tih te pawhin an kham thin a, entrance exam-a Personal Interview-ah experience nei a ni tak tak em? tia test na te pawh an nei thin bawk.


    Zirna Senso
    UK leh US University tha a zir tur chuan MBA zir man hi nuai 1000-2000 vel a tula, online MBA erawh senso a ziaawm hle. Tunlai hian kan ramah International University in campus an rawn nei nual tawh a, MBA nuai 100 vela zir thei dinhmuna kan ding te hi kan nihlawh hle. Kan ram University of Economic busatsaihin Yangon, Mandalay, Monywa leh Meikhtila ah MBA hi zir theih a ni a, Sorkar buatsaih anih angin a zirman pawh a tlawm. Mahse thil dang senso erawh a awm nual thung.


    Zir a tangkaina
    Thahnem ngaitaka zirte leh hmang thiamte tan MBA zir vanga nun hmasawn an awm rualin hmasawnna atana hmang lemlo pawh an awm nual . A tlangpuiin a hnuaia tarlan angah hian a hlawkna te a hmuh theih a ni.
    1. Hnathawnna huanga hruaitu leh nihna sang chelh
    2. Hna zawnna kawngah duh thlan tur a tam
    3. Thiantha siam
    4. Business leh Management lamah thiamna
    5. Private Business tan tanpuitu tha
    6. Thlahlawh a sang bik
    7. Mimal a sumdawnna kawngah pawh midang aiin an hlawhtling
    tlangpui thin.


    Fimkhur turte

    1. Senso a tamin, tuition fee chauh ni lo, thil dang senso,
    rualpawlna etc.., a awm nual thin
    2. Hun pek theih a tul
    3. Lehkha chhiar tur a tamin, hnathawh pah tul nen, tin rualpawl
    ngai bawk nen inpek zawh a tul hle
    4. Subject zawng zawng a ngial a ngana zirtir a nih loh avangin
    mahni duhthlan bik subject te zir ngawrh a tul hle
    5. Master Degree anih angin mahnia zir ngai te, research tih ngai
    te, zirpuite hnen atanga zirtur te a tam thin em em a ni. Tin,
    zirtirtuten zirlaite beisei anga zirtir loh chang a tam bawk.
    6. MBA zir zo nih vanga induhna, hna thawhna hmuna an policy-te
    maka ngaihlohna avangin harsatna a thleng thin
    7. Hna lama experience neilo te’n beisei angin hlawh an hmu tam
    lem lo thin.

    MBA graduate an tam tawh a, Hnalatute tana duhthlan tur a tam tawh avangin MBA graduate zawng zawng an ngaisangin hna an pe zung zung lem lo tih hriat a tha. Degree lakna university hming than dan azirin hnazawnnaah duhsak hlawh ani thin a, university hming thang taka graduate te tan duhsakna a sang bik. MBA degree nei theuh theuh graduate-na University vangin thlahlawh a danglam thei bawk a ni. Hnathawhna kawngah thawhthat dan azirin hmasawn dan a danglam dawna, Kan degree, kan remhriatna leh kan pianpui BA zirin kan nihna a danglam thei a ni tih hi hriat tur a ni.


    Ngaihtuah tur
    Ngaihtuah hmasak ber tur chu MBA zir a tul kher em? Engvanga zir tul nge? MBA zir zawh hnuah eng hlawkna/ chance nge awm dawn? Zir tul kan tih chuan hmanhmawh lova a zir dan tur ngaihven hmasak tur. Zir theihna tur eng program nge awm? Ram chhung/Ram pawn? Kan zir duh programte khawnkhawmin khaikhin ngei tur a ni.
    1. University background, hmingthan dan, recognize leh level
    2. Zir theih program te
    3. Admission tana university in a phut te
    4. Zir hun chhung
    5. Zirtur subject
    6. Zirtirtute chanchin
    7. Class neih hun- hna thawk pah te tan
    8. Class ah mi an tam em
    9. Servive an nei tha em?
    10. Hnazawnna lamah an tanpui em
    11. Scholarship
    12. Tute nge zirchhuak tawh a, tutenge zir mek
    13. Zirzawh hnuah eng service nge an pek
    14. Zirman pek dan, a hlawma pek tur nge …


    Thurawn
    Organization-a hnathawh hmaa MBA zir tum leh hna lama experience nei rih lo te tan MBA hi zir rih lo a tha. Business lam Certificate emaw Diploma course te zawh hnua MBA zir tan hi duhthusam a ni.

    Facebook comments