• CHIN COMMON LANGUAGE

    By: D. Than Puii Pu, Tahan-Satawm Common Language kan tih chu tawng chi tam tak hmanna rama tawng dang dang hmangtute inpawhtawnna atana an hman inbiakna tawng a ni. Khawvelah tawng chi tam tak a awm a, mihring maktaduai hnih tling chin tawng hmang hnam chu 228 an awm. Maktaduai hnih hnuai lam tawng hmang hnam 5000 awma hriat a ni. Chu chu “Indigenous People Challenge” tia vuah a ni. UNO member tlingpha sawrkar 191 an awm a, chu pawh chu tawng chi khat intawm ram tam tak an la ni tho.Keini CHIN(MIZO) hnahthlak Zofate pawh hi mihring maktaduai thum tling thei awma hriat kan ni. Tawng khat hmang ta ila, 228 belhchhah thei kan ni ang. Kan ram (Burma) ah hian tawng chi tam tak kan hmang a, maktaduai hnih chung lam tling thei tawng chi khat hmang hnam te chu KAWL maktaduai 32, SHAN maktaduai 3, KAREN maktaduai 2 leh ARAKANESE(Rakhine) maktaduai 2 an ni.Tawng hian a zapui, a tobul sawrkar ram bik a nei a, a darh zau zel a, tawng chi khat hian sawrkar pakhat chhungah township leh division tam tak a chim bakah sawrkar dangdangah pawh a darh zau zel a ni. A hmangtu mipui leh a ram fan a zau chuan chu tawng chu a hlu tawlh tawlh a, tangkaina a nei zau zel a ni.Khawvela tawng chi tam tak te hian tobul an nei theuh a, a tobul ramah chauh chu tawng chu hman tur tih a ni kher kher chuang lo. A va fanna ram apiangin an lo chhawr hlei hlei thin a ni. A fanna ram miten ramdang tawng “Foreign tawng” tiin an thik chuang lo a ni. Miten thu leh hla hril nan tangkai taka an lo hman hian a hmangtute a tipuiting zawk fo a ni. Tawng reng reng hi chi khat hlang liau liau hman pawh a theih loh, a famkim thin loh avangin tawng dang dang pawh hawhin an tuai hnum a, an tawngah an seng lut thin.Hnam lian zawkte tawng lo tarlang ila. A hriat awlsamna atan tawng tobul ram: “Hub”, a darhzauhna ram: CTS”, a hmangtu mipui: “SPS” speaking people tiin table han buatsaih ta ila, a hnuaia ang hian:–
    S/No. Language Hub. CTS (Hmanna Ram) SPS (Maktaduai)
    1 Chinese (Mandarin) China 16 874
    2 Hindi India 17 366
    3 English English 104 348
    4 Spanish Spain 43 322
    5 Bengali Bangladesh 9 207
    6 Portuguese Portugal 33 173
    7 Russian Russia 30 167
    8 Japanese Japan 26 125
    9 German Germany 40 100
    10 Korean Korea 31 76
    11 French France 53 77
    12 Chinese, Wu China 1 77
    13 Chinese, Yue China 20 71
    14 Javaness Indonesia 4 75
    15 Telugu India 7 69
    16 Maruathi India 3 68
    17 Tamil India 15 66
    18 Italian Italy 29 62
    19 Urdu Pakistan 21 60
    20 Punjabi, West Pakistan 7 45
    21 Panjabi, East India 11 27
    22 Chinese, Hakkha China 16 33
    He table-a chuang lo mihring maktaduai hnih chin chunglam hnam 206 an la awm. India ramah maktaduai hnih aia tam tawng chi 30 a awm a, China ramah chi 11 a awm. Khawvela ram fangzau ber leh lar ber English hian ram 104 ah ‘First Language’ in an hmang.Keimahni ve thung, kan dinhmun i thlir ang u hmiang. Kan Chin (Mizote) awmna leh tawng hman te chu…
    S/No. Name of Township Nameof Language Remark
    1. Tidim & Tonzang 1. Zo
    2.Tedim
    3. Siyin
    4. Hualngo 1958-ah Tidim biala dah a ni,
    1965-ah Tonzang bialah then a ni leh.
    2. Falam 1. Ngawn
    2. Bualkhua
    3. Zangiat/Tapong
    4. Khualsim
    5.Tlaisun
    6. Pawi (Laizo,Sim,
    Zahau, Hlawnceu) Hlawncheu Hnam 2 an awm.
    7. Lente
    8. Hualngo
    9. Lunghawh
    3. Hakha & Thantlang 1. Lai
    2. Senthang
    3. Mi-e Khualsim nen an inang.
    4. Thor
    5. Zophei Zophei, Lautu, Mara, Zotung, Senthang, Chi 5 hi Hakha-in “Zo” tiin an vai hma a ni.
    6. Lautu
    7. Mara (Lakher), Miram
    4. Matu 1. Matu (Ngala)
    2. Mara(Lakher)
    3. Zotung
    4. Dai
    5. Mindat & Kanpetlet 1. Dai
    2. Migang
    3. Mon
    4. Cho
    5. Taungha
    6. Paletwa 1. Khumi 1958 ah Chin State ah lakluh a ni, a hmain Arakan bial-ah a awm
    2. M’ro
    3. Khuangtso
    4. Ahnu
    5. Hualngo
    7. Thayet & Minbu Districts 1. Asho
    2. Siktui Siktui tawng hmangtu Ukpu hnam Kanpetlet-ah pawh an awm.
    8. Arakan State 1. Asho
    2. M’ro
    Kan tarlan te khi Burma ram Chin State leh a chhehvel chauh a huam a. India leh Bangladesh a huam lo. Chin (Mizo) hi hnam 53-in dah mah se tawng hlawm 32 a ni. Chung zinga hman lian, tawng 7 atangin tawngmal (word) 1000 lawrkhawmin Professor G.H Luce-a’n a endik a. Tawng 7 zinga a lar lehzual chi 3 te chuan tawng mal 700 zet an lo intawm tih a hmuchhuak a ni. A chunga Chin-Zofate tawng 32 zingah hian Holy Bible lehlin neitute chu he’ng hnam te hi an ni.
    1. Lusei (Mizo, Duhlian, Mar, Hualngo)
    2. Lai (Hakha & Thantlang)
    3. Laizo (Falam)
    4. Tedim (Kamhau tawng)
    5. Lakher (Mara tawng).
    Common Language nei tura sawihona hi Chin State chhungah leh Yangon University-ah te a lo awm tawn thin. Puitlin a harsatna (daltu) ber chu hnam pum huap (national) aia mahni hnam bik leh township (Myo-ne) rilru put bingna, in-itsikna rilru, hnam zim leh hnam bing rilru put nasatna hi a ni fo thin. Hnam 32 zingah Holy Bible nei 5 te tawng chi khat khat hi Common Language-Linggua Franca-ah hmang dawn ta ila, a tha berin a rinawm. Southern Chin State leh Magwe Division-a mite chuan nangni Northern miten tawng pakhat khat sualthlu thei u la, keini chuan kan zawm thei che u a lawm, an ti a ni.He tawng 5 hi a eng tawng pawh hmang ila, kan tawng vek tho a ni. Khawi rama lakluh tawng (imported language) mah a ni lo. An zavaiin Hub Language, Indigenous Language, Original Language vek an ni. A darh zau lam leh a fan zau lam erawh a inchen lo hle ang a. A fanna ram sawrkar danga mite an tam zawk vang leh an changkan zawk avangin kan thik tur a ni lo. A hmangtute kan nihlawh zawk a ni. Tawngin ramri a nei lo (Language has no boundary).Chin-Mizo tawng chi 32 zingah Chin-Mizo inti ve ve si mahni tawnga kan inbe thei lo, fiamthu pawh kan sawi tlang thei lo, thuruk pawh kan sawi tlang thei lo hi a zahthlak hle a ni. Indigenous People Challenge-ah Chin-Mizo pawh kan tel ve ngeia hriat a ni a. Mihring makdaduai 3 kan tling ve naa tawng chi khat hmang hnam maktaduai 2 tling zinga kan tel pha ve hrih lo hi chu a pawi hle mai. Falam khawpui kum 100 lawmna 1992 Magazine-ah Pu Kip Thian Pau-a’n “Kum 100 kan kim-a’n Common Language ka chhar ta, chu chu Hualngo tawng hi a ni,” a ti.Common Language- Lingua Franca Insingsak Dan:
    1. Evolution Method:
    Amahte-a rawn inher chhuak. He method-ah hian hnam bik induhsakna leh bial bik rilru zim neih avangin harsatna tawh a ni thin. Chin state-ah tawng chi 32 kan nei a, inkalpawhna a harsat avangin harsatna kan tawk a, puitlin chi a ni lo.2. Mixed Language:
    Hei hi tawng chitin chawhpawlh a ni. Tawng chi dang dang lawrkhawma tawng thar duan a ni. Europe khawmualpuiah “Esperanto” tiin an lo din chhin tawh a, a thiam pawh an tam hman viau. Mahse, a puitling thei ta lo.3. Language Borrowing Method:
    Hei hi tawng hawh chawp a ni a. Tawng chi hnih emaw chi thum emaw zir thiama inbiak pawhtheih dan kawng zawn a ni. Switzerland ramah tawng chi thum — German, Italian leh French an hmang a; miin tawng chi hnih a thiam chuan midang nen an inbe thei vek a ni. Switzerland-ah chuan an hlawhtling hle a ni. Chin State-ah Tawng 32 thiam kim tur chuan a theih loh tluk a ni.4. Revolutionary Method:
    Tlin ngei tura beih. He method hi chu township pakhat emaw hnam pakhat emaw tawng, tlang tawng atana nemngheh a ni. Sikul zirlaibu “Reader” leh subject danga hmantir a ni. Kum 10 chhungin a puitlin theih. Hei hi puitlin awl ber leh tihdan beiseiawm ber a ni.A chunga tihdan chi li kan tarlan hmangin he’ng Hakha, Falam, Tedim leh Hualngo (Duhlian/Mizo) tawngte hi lo khaikhin chhin ila.(a) Hakha:
    Chin State ram laili bera tawng hman a ni. Township 3 – Thantlang, Hakha, leh Matupi in an hmang. Chin State khawpui tawng a ni a, Gangaw, Kalemyo, Tamu leh Mizoram chhim lamah pawh a lar hle. Thu leh hlaah a remin a mawi a ni.(b) Falam:
    Laizo tawng, Pawi tawng kan tih hi a ni. Chin State khawpui hlui tawng a ni. Commissioner Headquarters hlui tawng a ni. Laizo tawngin lehkha an zir hmasa ber a, Chin radio-a thupuanna tawng a ni. A kiltu Tedim, Hakha ten an hriatthiam sa a ni. Tamu leh Kelemyo bial pawh a fan chak hle.(C) Tedim:
    Chin State chhunga mihring tam ber hnam tawng a ni. Kum 1962-ah mihring 84,000 an awm tawh a ni. Lehkha lamah hma a sawn chak a, an tawng hi thiam a awl bawk. Kalemyo bial pawh a fan chak le.(D) Hualngo Tawng:
    Mar tawng, Duhlian tawng, Lusei tawng, Mizo tawng tiin a fanna ram leh a chhehvela mite kohdanin hming hran hran a pu. Chin State leh Mizoram chhunga Mixed language a ni. Chin State township 9 zingah township 7-ah a tawng thiam leh hria an awmsa a ni. Thiam a awl a, bial rilru, hnam bil rilru putna a nep ber. Tawngkam bungrua a ngah, a tawng a mawi bawk. Literature-ah hma a sawn chak a, lehkha a neihna a rei tawh. Hualngo hnam hi Falam biala hnam 11 zingah a tel. Chin State-ah leh a darhna ram nen hmangtu ngah ber tawng a ni.Pu Kip Thian Pau-a’n “Chin State township 9-ah township 7 te hriat leh nelsa a ni a, bial bik rilru leh hnam bil rilru put a nep ber a, Chin mipuite Common Language a lo ni ngei mai,” tiin Falam kum 100 tlin lawmna chibai a buknaah a ziak a ni. Ziaktu dang dangte pawhin a hming chhal chiah lo mah se, a thawiin an ziak lang fo tawh thin a ni. A hming hi a lar ber vuah turin kan boruakin a la tlin lova. Tuna hriat lar ber “MIZO” tih pawh hi a tha tho. Mahse, Mizo tih chu Chin tih nen angkhata ngai lotute tan mi a delh deuh thin a. Discrimination attitude of racialism a kawk dawn thin a, fimkhur chu a ngai ngei mai.Table hmangin han tarlang leh ta ila.
    S/No. Language/Dialect Township Countries Hub Lirzapui Estimated Speakers
    1. Hakha-Lai Holh 1. Hakha
    2. Thantlang
    3. Matupi
    4. Gangaw 2 Hakha 2 Lakhs
    5. Kalemyo
    6. Tamu
    7. Lunglei
    2. Falam-Laizo 1. Falam
    2. Kalemyo 1 Falam 1.5 Lakhs
    3. Tamu
    3. Tedim-Kamhau 1. Tedim
    2. Tonzang 1 Tedim 2.5 Lakhs
    3. Kalemyo
    4. Tamu
    4. Hualngo 1. Falam
    2. Tedim 3 Falam 12 Lakhs
    3. Tonzang
    4. Paletwa
    5. Kalemyo
    6. Tamu
    7. Mizoram
    8. Chittagong Hill Tract
    A chunga kan tarlan Table-ah khian Hualngo tawng chu “Hub” language ah Falam biala Lirzapuia kan tarlanna chhan hi tlemin sawifiah a ngai a.Zofate thlahtu tam tak zingah Luseia hi titi (legend)ah a chuang fo thin a. Khampat-ah bung a phun a, Chin ramah kum zabi (AD 14)-na ah Sai chunga chuangin a hnungzuite nen an pem chho va. Parte-ah rei lo te khua dinin an chawl a. “Tai Tiang an tih Run Lui daidul pawnna ber dai kaiin tuna Tlaisun khaw hnuaia hmun zawl tha deuh maiah chuan khua a din leh a. Chu khua chu in 100 an lo tlin tak avangin “Zakhua” tiin a vuah a. Zakhua atangin Sumpui hmun a din leh a. Sumpui hmun hi 1892-ah in 130 an la tling a ni. Sumpuiah hian ruhro belpa lian pui pui-a phum an lo laichhuak thin tih pawh hriat a ni. Lungphera dawl puk thlanro a awm lo. Avangchu hetiang lungphera siam thlanrova mitthi zalh hi Sim lal Tian Hrang-a, Hlawnmual hnam, an phum atanga intan chauh a ni. Tian Hrang-a hmain Duhlian tawng hmang Luseiho hian Zakhua leh Sumpui hmunah khua an lo din tawh a ni.Tunhmaa Fahlam (Falam), tuna Tlaisun khawpui hlui ni ta hi Luseia leh a hnungzuituten Zakhua leh Sumpui hmum atangin hmun laili, sa leh ralah khambangin a hungna hmunah an din nawn leh a ni. Atirah chuan an fate tan thlam an sa a, chhunah an fehbo hlana fate thuhrukna thlam hmun a ni a, “Fa-thlam” a ni. Luseia leh a fapa Sum Hauva thih hnuah chuan Sum Hauva nau Lamlira’n Seipui khua a han din a. Duhlian tawng hmangten Seipui an pan chho ta a, an hnuchhawn ram Fa-thlam chu Lailun atangin Tlaisun hovin an va luah ve ta a ni. Tlaisun tawngin “Thlam” hi “Hlam” an ti a. Chutichuan, “Fa-thlam” chu “Fa-hlam” a lo ni ta a, “Fa-hlam” atangin “Falam” tia koh a lo ni ta a ni.Duhlian tawng hmang Luseia thlahten Seipui khua an din hnu hian Tlaisun thenkhat pawhin an zui ve a, an chengkhawm ta a ni. Chutih lai chuan Mizo tih a la tualleng lo. “Mar” tih a ni zawk. Seipui piah Khawsum, Bualzawl, Lunkhua, Simzawl, Lianduh khua ten an kil, Lui pawh khi tun thlengin “Mar Va” tia koh a la ni reng.Duhlian tawng (Mar Tawng) chu Falam, Seipui leh a darhzauna ram a piangah Pawi tawng nen an lengdun zel a, Duhlian tawng leh Pawi tawng hi Falam tawng an ti ve ve a ni. Falam hi an “Hub”- an Lirzapui, an “Orgin” ram a ni ve ve a. Duhlian tawng hi “Mar” hovin Lusei atanga hruaitu lal niin a thlahten ram an zauh zel avangin a pian leh murna ram aiin a ram lak a zau zawk; a tira ram pakhat, a hnu lama sawrkar pathum meuhva tawng tlanglawn (main language) nihna a chang ta a ni.Falam bialah chuan Duhlian tawng hmangtu intek (inneitu) nihna changtu chu Hualngo an ni a, Pawi tawngin “Mar” an ti. Chu “Mar” tawng (Hualngo tawng) chu Tiau ral a kai hnuin, Duhlian tawng, Lusei tawng, Mizo tawng, tiin hming a pu thluah ta a ni. Pawi tawngin — “Duhlian khua ka tlawnah ka ke do dup ta-ngai, Chinrang vate bang tikua hrawn thlai thlo iang” tih hla pawh a awm a. Tedim hlaah — “Sai pui pui mah vun tinga, Duhlian pa a zang vung ting lo, zang bial khum aw e, zang bial khim aw e,” tih hla te pawh a lo awm ve a ni.India ram, Assam state hnuaia Lusei District a nih laiin Lusei-Hualngo hnam peng Thangur-Sailo hovin “Lusei” an intih avangin a ram neitu lal hming pu-in “Lusei Tawng” an ti a, a lo rei deuh hnuin Lusei District chu “Mizo Ram” an puttir a; 1947 leh 1954-ah Mizo an rawn vuah leh hnuah “Mizo Tawng” a ni leh hnuhnung ta a ni. 1986, February thla ni 20-ah State puitling a lo nih atangin “Mizo tawng” tiin a lo ding nghet ta a ni.Mizoramah hnam 46 meuh awma sawi a ni a, chu chu Mizo hian a huap vek a. Mizorama hnam awm zawng zawng pawh Burma rama Chin State ah an awm kim deuhthaw a ni. Burma ram Chin State leh a chhehvelah hnam 53 meuh awmin record a ni bawk. Chuvangin Mizo-in a huap kim vek angin Chin pawhin a huap kim vek a ni. Chin ta bika hauh theih a ni lova, Mizo pawh chu tho. Duhlian, Mar, Hualngo, Lusei, Mizo tawng pawh hi Chin zawng zawng, Mizo zawng zawng te tlang tawng a ni a, kan vaia ta a ni. “Mizo emaw ka ti a, a ni lo” kan tiha te hi kawl-vai an nih loh chuan hman chi a ni lo. Chin pawh Mizo, Mizo pawh Chin — hnam tenau “Trible” tam tak khaikhawmtu hnam hming, national hming, inang, hrulkhat (Parallel) a ni. India-ah Mizo, Burma-ah Chin, mi pakhat hming hnih nei kan ni e.English-in khawvela “colony” ram zau tak a lak hma khan kan Chin-Mizo ram awptu sawrkar khawpui “Fahlam” kha i hrereng ang u.Tribal Chief an tih hnamtin lalte khan Fahlam-ah a ni “CHHIAH” an lo pek. Kawl leh Vai hnenah an lo pe lo. Seat of Government chu “Falam” a ni. Sawrkar pakhat hnuaiah tawng chi tin kan hmang a, tunah chuan sawrkar 3 hnuaiah thendarh kan ni ta a nih hi. Hnam pakhat citizenship 3 kan ni ta. Tuna kan dinhmun ang chuan thlir ta ila Mizoram tan chuan Duhlian tawng hi a foreign hlauh zawk lo vang maw? Saptawng hi khawvel ram 104 ah first language-ah an hmang a, England mi an ni chuang lo. Portugal mi chu maktaduai 10 chauh an ni a, an tawng hmang Brazil ram chu mihring maktaduai 180 an chuang tawh.Engahnge Mizo tawng ti mai lova, Hualngo tawng miten an tarlan thin? Hrethiam lote mitmei ven a ngaih vang a ni ang. Dr. No Than Kap-a lehkha ziak pakhatah chuan, Falam tawng leh Mizo tawng inanna 72%, Hakha leh Falam inanna 82%, Tedim leh Falam 66%, Chittagong Bawmzo leh Falam 70% a inang, a ti a. Chuvangin an inlaichinin an insuihkhawm vek a ni. Ka fan ram “Dai, Utpu” hnam, hmai chiu dumho tawng nen pawh 60% chu inangin ka hria. Thla 6 chhungin an tawng kan thiam thei a ni.Kalemyo leh Tamu bialah hian Mizo tawng a lar chak tur anga a chaklohna chhan a awm a, chu chu Mizoram atanga he biala rawn pem lut thenkhatten mahni pian leh murna hrechiang lovin, Chin State atanga rawn pemlutte tana ngeiawm tawngkam te an hman thin avangin intihhranna a awm zeuh zeuh va. CHIN mia “National registration Card” nei tawh thenkhatten Chin mi atangin 23/3/1963-ah an tlanchuak a. Chu chuan mite ngiau a titliak a, lungrual taka insuihkhawm a harsat phah ta a ni. Hnampui dangten hnam khata min en lai a, keini intithiam lova, chungnung zawk (suppermacy) kan inchuh te hi a zahthlak lo maw? Mr. B. S. Cary leh Mr. Tuck-a ten “Chinho chu mahni hnam theuh ropui bera inngai hnam, “Trible” hnam dang hmuhsit an ching theuh va, do te an indo thin a, mahse kan khaikhawmin hnam khat “Kuki Nation” vek an lo ni tih kan hmuchiang ta e” zuk ti a.Duhlian tawngin a chak tur anga a chak loh phahna kan tarlang tawh a. A chakna chhan lam pawh sawi tur a awm ve tho a ni. Mizoramah thawh tur leh ei-in zawnna a lo awlai zawk avangin Paletwa, Matupi, Hakha, Falam, Thantlang, Tedim, Tonzang, Kalemyo leh Tamu biala awm kan thalaite a hmei-a-pain an feh thla a. Hna tinreng thawkin an inhlawh a. Chan tha pawm pawh an tam a, vanduaina tawk tate pawh an awm. An lo hawnga Mizo tawng thiamin an rawn hawng leh chu kan tha tlang sawt hle a ni. Kan tawng te hi 70% inang an nih avangin thiam a awlsam a ni ang. Kum 1996, January thla ni 31 khan Yangon-ah Capt. Vuta’n “Lusei tawng hi Chin State pawhin hmang ve turin beihpui thlak teh u a,” min ti a. “Kan thalai tam tak Mizoramah inhlawhfain an fehchhuak a, Mizo tawng thiam sain an lo hawng leh a, beihhrampa ngai lovin kan thiam tawh chu a ni a lawm” tiin ka chhang a. Tawngah ve thung hma kan sawn phah ta niin a lang. Sap tawnga “Blessing in disguise” an tih ang ziazangin.Duhlian-Mizo tawng hi “Common Languagge” ah lo hmang dawn ta ila, a tawng neitu tan engnge hlawkna awm ang? Mifel, mithiam, mi rinawm, mifing, mi hawihawm leh hruaitu nih thiam (leadership efficiency) neih a ngai ang. A tawng neitu ni loten engnge an chan ang? Mi rinawm, mithiam, mifel an nih phawt chuan khitah chawisan an ni mah zawk ang. Vobik tur a awm lo. A hnam “Tribal” zawng ni lovin a mimal (Individual) felna zel a ni zawk thin.Common Language kan sualthluk theih nan ruahmanna neih sa a tul, a hun a thlen hmain mite ngiau titliak thei tawngkam thlahdah ching lo ila. Dawhtheihna (tolererance) neih pawh a tul a ni. Tunah erawh duhthlang thei dinhmunah kan la ding miau si lo. Engtikah nge tlang tawng chu kan neih ve ang? Khawvel hi inbiakpawhna a awlsam sawt hle tawh a. Rilru zim (thliarkar rilru — narrow mainded tribalism) a ral tial tial a. Miten “Global Village”an tih laiin hnambing (tribal) ah kan thalaite leh thangtharte inhnamhnawihna a ziaawm ve ta zel a. Hnam pakhat “One nation and one language” neih a pawimawhzia an rawn hmuchhuak tawh a ni. “Multi-language” nei hnam lian pakhat hi khawvel insingsak chakdan zuiin “Common Language” nei hnam ropuiah kan tesin faten an rawn phurchhuak ngei ang. Hmanhmawh lutuk leh thahnemngaih lutuk alamah innawr sual palh lo turin insum erawh a ngai.Tunah chuan kan “tribal” tawng (dialect) te tein chimral an tawk mek a. Hnam dang tawng zeptel lovin kan titi thei lo hial ta a nih hi. Thil tha lehtur thlirin “Far-sightedness” nei ranin, indawh tawnin, hohbilna rilru zim hnawlin tan i la ang u hmiang.
    PS: Khawchhak Zofaten kan thanmawhbawk zinga langsar tak pakhat chu—“Tlang Tawng” lungrual taka hman tur kan la chherchhuak thei lo hi a ni awm e. He mi kawnga ngaihdan fing tak leh ngaihdan ropui tak ziaktu hi Pu Do Thawnga MP (D. Than Puii Pu) a ni. He a thuziak ropui tak hi; Rihlipui Tlangau Vol.3, atanga lakchhawn a ni. Type sual palhna a awm chuan; a type chhawngtu keima (Dika) mawh a ni ang a, ngaihdam ka dil nghal e.

    Facebook comments