• MYANMAR RAM ZOFATE (MIZO-TE) KA HMUH DAN

    MYANMAR RAM KA HMUH DAN ZOFATE (MIZO-TE) KA HMUH DAN
    By That Savunga

    Vanglaini January 20, 2016 chhuaka Pu Zomawia Khiangte Thuziak MYANMAR RAM KA HMUH DAN tih kha ka lo chhiar ve a. A hmuh dan a ni miau a, a hmuh dan kha chu chhui ka tum lo a, a bel dan erawh kha chu han sawi fiah ngai tih deuh ka nei a, ka'n thai leh hlek ang e. Ka sawifiah hmasak duh chu Burma khua leh tuite hming list Shan, Karen a tihte zinga Chinese leh Indian a dah tel kha a tisual nge ka hre lo a, Chinese leh Indian chu Myanmar ( Burma ) citizen an ni lo; Chin tih kha Chinese tiin a dah palh a ni mai awm mang e? Nge, Chanchinbu lamin an lo tih danglam sak zawk? tih hriat a ni si lo a. A enga pawh chu lo ni se, hetiang lam hawi thu hi thenkhat tana ninawm khawpin ka lo ziak ve tawh thin a. Inthlahrung viau mah ila, a bel dan dik zan loa ka hriat avangin a facts te nen ka han ziak leh ang e.

    A hmasa berah chuan Mizo hnahthlak Pi Lalremsiami a tih hi sawi tulin ka hria. Kum kal ta 2015, November Ni 28- chhuak The Aizawl Post ah khan The MIZO MEMORANDUM chhuah tura ka ngen chu tlawmngaiin min lo chhuah sak a. Khate kha Pu Zomawia hian a lo chhiar ve lo em ni aw? ka tih phah vawng vawng mai. Keima phuah a ni lo a, Mizo Union Partyin independent tawh mai tur India Sorkar laipuia an lo zu thehluh kha a ni a. Chutah chuan "Again, it was wrong that the word Lushai should be used as covering all the Mizo tribes since it is misrendering of the Lusei only a sub-tribe of the Mizo race. Hence though, perhaps, not originally intended, it has created a division. Only the word ' Mizo ' stands for the whole group of them all: Lusei, Hmar, Ralte, Paite, Zo, Darlawng, Kawm, Pawi, Thado, Chiru, Aimoul, Khawl, Tarau, Anal, Purum, Tikhup, Vaiphei, Lakher, Langrawng, Chawrai, Bawng, Baite, Mualthuam, Kaipen, Pangkhua, Tlanglau, Hrangkhawl, Bawmzo, Miria, Dawn, Kumi, Khiangte, Khiang, Pangte, Khawlhring, Chawngthu, Vanchiau, Chawhte, Ngente, Renthlei, Hnamte, Tlau, Pautu, Pawite, Vangchhia, Zawngte, Fanai etc.--all closely related to one another culturally, socially, economically and physically thus forming a distinct ethnical units." tiin an lo dah diam a ni. Hnahthlak tih hi eng tih nan nge a hman tih hriat a ni lo a, Mizo ni ve chiah lo, Mizo nena inlamhnai a tihna ni maw?

    Again, it was wrong that the word Lushai should be used as covering all the Mizo tribes since it is misrendering of the Lusei only a sub-tribe of the Mizo race." tih chu a tawi zawngin han hrilhfiah dawn ila; "Lusei chu Mizo hnam peng hming mai a nia, hnam pum khaikhawm nana hman a dik lo ang," tihna a ni. Tin, Chin leh Mizo chu thuhmun reng a nih dan hetiangin han tarlang leh dawn ila. " These Chin tribals ( called Mizos in India ) " Hemi awmzia chu, " Heng Chin hnamte hi ( India ah chuan Mizo tih an ni ) " tihna a ni.
    Pi Lalremsiami a tih hi a hre fuh lo deuh a ni mai thei. Kan hnung inthlana NLD ticketa thlan tlin kha kan nau / kan fanu Pi Khaw Tin Siami ( D/o. Do Thawnga Ex-MP elected-1990 ) a ni. Mizo hnahthlak mai nilo Mizo/ Chin dik tak Lusei chi peng Hualngo a ni. Mizo Memorandum-in Mizoa a lo dah tawh zawng hi chu hnahthlak tih tur an ni tawh lo ang. Chu mai pawh ni loin, Mizo Memorandum buatsaihtu ( Mizo Union puipa te khan hmaih palh dang la awm thei turte kepin, a tawp ah ' etc.'- tih an lo dah avangin list a an telh loh chi dang pawh Mizo tih tur an ni, hnahthlak tih hi hman fo a tulna ka hre lo. Hnam inpumkhatna tichhetu tobul chu he HNAHTHLAK tih tawngkam hi a ni.

    Pu Zomawia Khiangte khan a sub-title 1-ah Burma mi kan hre chiang lo tih hmangin ' Burma ah khian hnam hrang hrang 135-lai an cheng khawm a' a ti a. Burma ah khian major ethnics an tih mai hnam hlawm lian deuh deuh Hnam 8 an awm a, chungte chu, Burmese, Chin, Kachin, Karen, Kayah, Mon, Rakhine leh Shan te an ni. Burmese tih loh Hnam 7-te hi chuan State hran an nei vek a, Burmese ho chuan Central Thuneihna hrawmkhawm vek an tum tlat avangin Statehood pawh la ve duh loin Region 7-ah an inthen a, heng regionte hi State te ang bawkin thuneihna an neihtir lawi si a ni. Heng bakah hian Special Region pawh 6-vel lai an awm bawk a, Naga pawhin Sagaing Region atangin Special Region hi an nei ve.
    Burma ramah hnam 135-an awm a tih hi kan hnung 2014-a Census an lak khan mipuiin an hre chauh a. Kha kha 1982-a BSPP Sorkar laia National Policy an zam ( draft ), an nemngheh dung zuia an hman mai a ni. Kha National Acts 1982- kha Immigration and Man Power Department chauh lo, department tin ten an nei vek a, Office of Strategic Studies, Ministry of Defence ( Union of Burma ) pawhin an nei a, chumi dung zuia an kalpui a ni. Khing major ethnics te khian Code No an nei vek a, hetiangin; Burmese Alphabet indawt dan zuiin Kachin Code No chu 100, Kayah 200, Karen 300, Chin ( Mizo ) 400, Bamar ( Burmese ) 500, Mon 600, Rakhaing ( Arakanese ) 700 leh Shan 800 te an ni. Heng major ethnic ho hian chi peng an nei leh theuh a, Ent: Kachin Code 100 hnuai ah 101-112, Kayah Code 200 hnuai ah 201-209, Karen Code 300 hnuai ah 301-311, Chin / Mizo Code 400 hnuai ah 401-453. Hetiang zel hian an Code hnuai ah an chi peng hming awm zat ang zelin 1 a\angin Code No hi an pe leh zel a ni.

    Tin, Myanmar National Policy ( 1982 ) hi Britishin Myanmar ram leilung an rawn lak hmasak ber 1824-a Burma leilunga lo inbengbel nghet tawh te thlah atangin an chhui tih kan hriat a tha ang. 2014-Census buatsaih tura an inpuahchah laiin khing an code behchhan khian ethnics tina mi chu an telna Head Code ang zelin bul an tan sak a, keini Chin ( Mizo ) te pawh 401 atangin 453 thleng Code No kan nei a. Duhlian tawng hmang ho phei chu chi thum laiin min then hrang Ent. 404 Ka-Lin-Kaw ( Lushay ), 440 Lushei ( Lushay ) leh 447 Hualngo tiin. Chi dangte pawh hming hnih hming thuma then an awm ve nual tho. Tin, Ka-Lin-Kaw ( Lushay ) an tihte hi Paletwa Biala lo zu awmhote kan ni a, Khumi Unau ten Tlengkaw min tih chu Kawl lehkhaa min ziak leh dan mai a ni. Tlengkaw tih pawh hi Tlaikuang tihna an lam thiam ve dana an hman a ni a, a awmzia chu 'bengbeh lian beh ho' ( saiha bengbeh beh vang a ni mai thei ) tihna a ni tiin CHIN-LUSHAI LAND tih bu ziaktu Surg. Lt. Col. A. S. Reid' an Tlaikwin tiin a lo dah ( p-143 ) ah kan hmu. Tin, ' Chin State ah khian Mizote leh Zo hnahthlak hnam hrang hrang an cheng,' a ti a, Mizo a tihte chu tute nge ni ang a, Zohnahthlak a tihte chu tute nge ni ang? Mizo Memoranduma Mizo te khi thenkhat chu Memorandum Mizo hming list a chuang Mizorama awm miah si lote an ni; chungte pawh chu Mizo an lo ti mai. Hnahthlak tia dah zel a ngai tawh lo. 1891-Burma Census Report ah chuan hetiang hian kan hmu." In the Burma Census Report of 1891, Chin ethnology is dismissed with the remark that the Chins or Kyins are a group of hill tribes, all talking various dialects of the same Tibeto-Burman speech, and calling themselves by various names," tiin. ( B.S.Carey and H.N.Tuck,The Chin Hills, Vol.I.1896,p-2,para.5) Hei hian keimahni'n nomenclature ( Common Name ) kan nei lo min tihna a ni. Chumi tihbo nan chuan Mizo Union party khan Mizo Memorandum chu siamin Mizo hmingin nomenclature chu an lo buatsaih a, India Sorkar laipui chuan 1952-ah pawmin 1954-ah Mizo hming chu an lo officialized ta a ni.

    Amaherawhchu, hei hian Bangladesh ni ta East Pakistan a Kuki te leh Burmaa Chin te a huam lo. Chuvangin Burma chuan hmasanga min lo koh dan Chin chu vawiin thlengin an la officialized reng a, major ethnic 8 zingah a dah hial zawk bawk. Chin hming chu Burma ah chuan a mikhual lo a, Mizo hming erawh India ah a mikhual lo ve thung bawk. Chumi a chian em em na chu, " The Chin Hills Vol. I bu kawm tuamna thleh luh ( inner flapped ) ah pawh "These Chin tribals ( called Mizos in India )" tia dah a nih dan ah hian a hriat mai. Kha Mizo Memorandum kha East Pakistana Kuki leh Burmaa Chin te nena inthuruala mahni awmna Sorkar ah theuh lo thehlutin Sorkar ten min lo pawmpui vek chu ni se, kan vaiin Mizo kan inti vek ang.

    Tin, a sub-title 4-na Mizo hnam inpumkhatna a khi a tih ah pawh khan 'Hualngo hnam ho khian Mizo/Lusei hnam an inti duh tlat lo mai a,' a tih hi hetiang hi a nihna dik tak chu hetiang hi a ni. Chin Special Division hun lai leh State hun hnua rei tak hna pawimawh tak tak lo vuan tawh Pu Sing Khaw Khaia'n a lehkhabu Zo People and Their Culture tih buah Census of India, 1931 Vol. XI, Part I, A Repot by J.J. Bennison behchhana a tarlan ah Lushei leh Hualngo ( Whelngo ) a lo dah hrang a. Chin Hills Gazetteer lamah pawh Hualngo chu Chin Hills mi leh sa zinga lo dah reng thin an ni a. ( The Chin Hills Vol. I. p-148 etc. ). Burma ah chuan Chin hi Mizote identity a nih avangin hei hi an pawm mai a. Mizoram atanga lo han chho ten Chin an intih duh tlat loh avangin Burma Lushai tia registered an lo ngai ta a. Hualngoho chuan Lusei chu kan nia, kumkhuaa Burma ( Chin Hills ) a awm kan nih avangin "Burma Lushai"( pem thar / mikhual cham bang ang chu kan ni ve lo an ti, a ni ber."These Chin tribals ( called Mizos in India )" tia dah a nih reng chung pawh a Chin an intih duh tlat loh hi Hualngo chauh lo, unau dangte pawhin tha an ti bik lo a ni.
    Mizorama mi ten kan lo hriat chian theih nan chuan tuna Burma ( Tahan-Khampat vela ) Lusei inti ho khi Lusei tak tak chu mi tlemte an ni a. Sorkar ah Burma-Lushai tiin an inregistered a, tawngka chuan Mizo an inti leh si a. Chu chu a dik lo a, MIZO MEMORANDUM pawh a kalh a, Mizo tih leh Lusei chu thuhmun ah a ngaihtir thei a, a dik lo tih chu list ah khian kan hmu thei ang. Lusei chu Mizo Memorandum pawhin "only a sub-tribe of the Mizo race, ( Mizo Hnam peng ) "a tih reng khi.

    Burma Sorkar chuan Revolutionary Council hun lai khan "Burma-Lushai" tiin lo registered mah se, Chin Society atangin an paih chuanglo tih chu a chunga National Policy an lo siam tawh atang khian kan hre thei mai ang. India ( Mizoram ) ah Chin intih a remlo ang bawkin Burma ( Myanmar ) ah pawh Mizo intih a remlo ve bawk, Foreigner ka ni intihna ang lek a ni. Sorkar laipui ve ve te min hmelhriat dan a thuhmun tlat loh avangin official chuan hman kawp a remlo a ni ber mai. Mizo Memorandum kha Mizo tawnga lehlin veka tlangzarh atan a duhawm hle, a Sap tawnga hre theilo ten an lo hriat ve atan.

    Pu Zomawia'n " Hualngo hnam ho khian Mizo / Lusei hnam an inti duh tlat lo mai a," a tih kha chu kan chhang zo tawh ah ngai ila, " Myanmar Sorkar Census ah pawh Lusei / Lushay hnam Code No chu 440 a nih laiin Hualngo ho chuan Code No. hran 447 an nei daih mai a, a pawi hle," a ti a. Code No. hi Hualngo dil chhuah pawh a ni lo hrim hrim a, tumahin an duh lo. Burma Lushai ho pawhin an dil chhuah a ni bik lo. Myanmar Sorkar laipuiin hriat awlsam tur leh Computer-a chhianchhiah a awlsam nan an pek mai a ni, para 5-na ah kan ziak tawh khi. National Policy dung zuia list an lo siam ang ang khan Code No hi an lo pe mai zawk a ni. Hre chianglo ten an lo hrilh chu Pu Zomawia hian dik turah a ngai a ni ang.

    Burma Lushai inti te avang khian buaina namenlo a lo chhuak fo tawh \hin. Mizoram mipui leh Sorkar ngei pawh hi zualko nan an rawn hmang \hin a. Harsatna an tawh hlek leh Hualngo hekah an puh thla zen mai zel a. Hualngo an puh duh vang hrim hrim ni maw, Burma Intelligent Bureau chak zia leh that zia an hai der lui tlat zel bawk a. Thudik ziktluak lo hmanga thu an sawi lah a tam, kan sawi seng lo ang. An ngamlohte beih nan Hualngo chungah an tuan awllo bawk a. A titu an hriat reng pawhin Hualngo chi pumpui chirhtheh nan an hmang hreh chuang lo bawk. Myanmar Sorkar policy hi Hualngo tlukin an hre lo hrim hrim a, hre chiang loa sawi lah an hrat hle bawk. Pu Zomawia hian Lusei inti bingho leh Hualngo te sawi dan bak ah an unau Khiangte te tamna Ngawnho pawh zawt sela chuan thudik chu a hre ngei ang.

    Burma Sorkarin a nationalized dawn pawh khan politics-a an inrawlh ve loh tur thu an dilna ah an tarlang tel reng a. Sipai Sorkar hnuhnung SPDC-in National Convention a huaihawt khan palai tirh ve an dil a. Sorkar chuan electorates 50,000 an tlin chuan palai chu an tir thei ang tiin an lo chhang a ni awm e. Mi 50,000 tling tur chuan list an la a, an huat ber Hualngo hming tam tawk an ru a, chuti chung chuan mi 20,000 che che an la thei a, palai an intir thei ta lo a ni. 2010-Election ah khan Lusei hming ni loin SPDC ticketin Tamu bial MLA atan Pu D. Thangliana ( RIP ) pawh a ding a, a tlin ve kha. Aizawl ah pawh lo kalin Chanchinbu ah te pawh Lusei hmingin MP kan nei thei, Chin leh Lusei a hran ve vein kan ding thei te a rawn tih nghe nghe kha. 2015-Nov. 8 Inthlanah pawh Pu D. Thangliana nupui chu Lusei hming nilo USDP ticket bawkin Tamu bial atangin a chuh ve leh tho a, a tling zo ta lo mai a ni. Tahan lamah kan nau Pi Khaw Tin Siami ( D/O Ex-MP Do Thawnga ) pawhin NLD ticketin MP a chuh a, NLD boruak ( a thli beng ) chak zar a zo a, a tling ve mai. Hualngo hming chuan chuh se a tling zo lo ang. Pu D.Thangliana thiannu pawh Lusei hming nilo, USDP hmingin ni a chuh ni. ( Pu Zomawian Pi Zoremsiami a tih kha a hriat fuh loh palh a nih ka ring, Khaw Tin Siami zawk a ni e. T.Sv )

    A reng reng thu ah, Lusei hminga MP nih chu sawi loh, MLA, MDC, L/C, V/C tak ngial pawh a nih theih loh zia Mizorama mite chuan kan hriat vek hi. Mizoram MP ( Lok Sabha ) ngei pawh Lusei pa dik tak a ni a, Lusei hmingin ding se englai mahin a MP ngai dawn lo a, kan MP ( Rajya Sabha ) ni lai pawh Tlau hmingin ding se a tling ngai bawk lo ang. An awmna party hmingin ni an tlin zel zawk ni. MP ( RS ) hlui Pu Hipheia pawh Mara a ni a, Mara a nih vanga MP tling a ni lo a, a awmna INC ( Indian National Congress ) party MLA ten an thlan tlin a ni. Sagaing Regional Ministry ah khian Chin Affairs Minister ah Pu No Than Kap a lo awm tawh a, ani pawh Zahau hminga ding leh tling ni loin Chin Progessive Party ( CPP ) hminga ding leh tling a ni. Tun tum inthlan ah NLD party hminga ding Pu Lal Thawm Thang chu Chin Affairs Minister tur atan thlan tlin a ni ve thung a. Tahan chhehvela Lusei inti te chuan Chin State Sorkar ah Chin Affairs Minister a awm la ring thei zela maw le! Politics an hriat loh dan chu chhah tak a ni. Hei vang hian a nia, Lusei Affairs Ministry a awm ve theih an rin reng chu ni. Ethnic Affairs Ministry hi kan han sawi tak major ethnic hming chauha dah a ni a, Chin hming chuan Lusei pawh, Paite pawh, Matu pawh an ni thei vek ang chu, a chibing hming chuan a theih lul loh a ni e.

    Mizoram atanga lo han zinho apiang an ta hauh zel a, thu dik chanve an lo fah teuh teuh zel a, awih tawk pawh an lo awm thei ve zel a, mi tak tak chin chuan awih chin tawk leh awih sen loh chin chu an hriat tho ka ring. Tunah pawh Pu Zomawia Khiangte chuan Hualngo chu Lusei / Mizo nih ve duhlo ah a puh thluk der mai hi. Amah Pu Zomawia chuan an thu bul leh bal a hriatpui pha dawn lo a, an sawi ang ang kha a hriat dan a rawn tarlan mai a ni a. Anmahni'n Hualngo hoin Chin Identity an pawm anga an pawm ve duh loh thu chu an lo hrilh leh si lo ni awm tak a ni. Tute emaw uan khum nan leh intihtheih khum nan an Chapchar Kuta khuallian atan kan MLA te, kan minister zahawm tak tak te pawh drugs leh arm traffickerte tum khana hruai thlen chhoh mai an lo tum tawh a nih kha. Chumi atan mahni Sorkar ( Chin State Sorkar ) chu palzut mai mai an lo tum leh nghal a. A theih loh zia an hriat hnu pawhin an dawr tha leh duh chuang hlei lo a. Kan Chief Minister zahawm tak zawkin a lo han dawr a, a tepter tawh si avangin a hlawhtling hman ta lo a ni awm e. Lo han dawr duh se, tanpui an hreh dawn loh teh reng nen. Tunah chuan, " Kan va tihluat ah lengin ka zir sual e," tih ang mai kha an ni zo ta. An hetih reng chuan Hualngo ho pawhin an run luat ah duh aiin an pen thui ve mai ang tih a hlauhawm a, a la pawi hle dawn a ni.


    Chuvangin Tahan-Khampat lo han kal tur mi dangte pawhin Chin State Sorkar hriatpuina lak tum zel tawh ila, ENGA ho chauh thlenchilh loin Paite kan tih Zomi te, Pawi kan tih Laimi te belbul zawk thin ila a tha ang. Mahni lamhnaite chu a kanin kan chauh zawk thin ila, chu chuan inlaichinna tha zawk a chhuah ang. Kan hriat sual loh chuan kan hnung kum 2015-a chhiat an tawh vanga tanpuina kan lo han thawnte pawh ENGA hoin an ta bik tur emaw an ti ni awm tak a nia, a dik a nih chuan a pawi hle dawn a ni. Diklo hram se ka ti khawp mai. Tin, leh lam thu chauh la tawh loin a leh lamte thu pawh hriat tum a tha ang. Mizoram atanga lo han kalte hi inti-Lusei ho khian an lo khalh bingin an lo hauh tlat a, midang an kawm theih loh nan an kal duhna a piang ah tlawmngaih vang ni pah fawmin an guide zel a, chu chu Hualngo laka an vuivaina chance atan an hmang thin a ni. Chuvang chuan Dr. P.C. Biaksiamate lai lai pawhin a laichin ( a Luseipui ) Hualngo ho chu, " Mizo nih ve chak ngawih ngawih " a lo tih duh phah hial kha. Khatianga a sawi kan lo hriat pawh khan a thu dawnna kan lo ngaihtuah thleng nghal mai.


    Pu Zomawia Khiangte thahnemngaihna luangliamin a rawtna hi a tawp nan lo chhang leh ila a tha ange. " Hualngote chu Mizo hnahthlak ngei an ni si a. Khi lai hnam inpumkhatna chhe mek siamtha tur khian Mizoram atangin mithiam leh rintlak tirh chhoh hial chi niin a lang. Hnam tlem tawh nak a laiin, a phel darh zawnga movement lo awm hi a pawi hle," a ti a nih hi.

    A chung para 7-naa kan han tarlan tak " These Chin tribals ( called Mizos in India )" ang hian Mizoram Sorkar leh NGO te hian Mizo inti tawh loin Chin inti tawh rawh u. Heta in rawn kal chuan a Chin pum pui khian Mizo in ni vek tho a, khitah chuan keini pawh Chin kan intih a ngai," tiin an zualkona thu apiang barah lo khawn loin lo hrilh zel mai se, mithiam lo han intirh a ngai lo ang. Hualngo chauh lo Chi dangte pawh khian Mizoin a huam tel tih an hai lo, Burma leilung a nih avangin Burma Sorkar identified danin Chin an inti mai a ni. Chin National Day ah te Cultural Troupe tirin Mizoram Chapchar Kut ah Chin State Cultural Troupe te sawm ve zawk ni thei se, chu chuan in unauna tha zawk a hring chhuak mai ang. Hualngo leh Lusei inkar thu chu ngaihthah hmiah zawk tur a ni ringawt. A tenau em mai. Chaw tak khuka kan lo khukpui vak vak hian a ni an inkar buaina a so san zel zawk dawn ni.

    Pu Zomawia Khiangtein, " Hualngo ho chuan, ' ENGA tawng hmang nih vang ngawtin Mizo / Lusei kan ni ngawt lo. Pi leh pute atang tawh khan Hualngo kan ni' an ti tlat mai," a ti a nih kha. Hualngo chu Lusei pawh an ni a, Mizo ( Chin ) pawh an ni ngei mai. ‘Burma-Lusei’ tia registered chawp erawh an ni lo. Chin Hills lo awptu British Officer ten Lusei / Lushai tia dah loin Hualngo tia an lo dah leh a ram leilung fate zinga chhiartel an nih ve avangin hming hran an pu thei mai lo a ni zawk. Chin Hills Gazetteer Vol. I, p-148 ah pawh hetiang hian an lo dah hi. " The Whenoh/ Hualngo community consists of Lushais who have been left behind in territory which is now a part of Chinland, but which formerly was inhabited by Lushais," tiin. Pastor Liangkhaia MIZO CHANCHIN ( p-9 ) ah pawh Hualngo chu Lusei an nih chiang takin a dah hi. Ziaktu dang dang pawhin an dah vek, Burma-Lusei tiin an dah lo vek bawk tih kan hriat a tha ang.


    Kan thuziak khar nan chuan Mizoram atanga Tiau chhak lo han zuan tute zawng zawng khian Burma-Lushai an invuah vek lo. Entirna hnai ber atan Dr.Khuangliana ( L ) te chhungkua ngei pawhin an Identity Card ah Burma-Lushai seal an inchhuttir ve lo tih kan hre chiang a, midang pawh an awm nual awm e. Chin an intih avangin State Scholarship-in Australia ( Melbourn ) ah Ph.D a zu zir zo thei a nih kha. A patea fapa, a hming ka hriat ve loh pawh an chhunga Burma-Lushai seal an inchhuttir avangin Professional ( he lama Technical kan tih ang hi ) a zir theih loh phah tih an tunuin a sawi nghe nghe a ni. Thudik bul leh bal hriat tum lo a, Hualngo hlir beih mai hi bansanin inlamlet se, Mizorama rawn zualko fo emaw, Mizoram atanga lo han zinte hnena lo leiko fo emaw, Mizorama mithiam rintlak deuh lo han tirh emaw a ngai reng reng lo ang.


    Mizoram chu sawi loh India Sorkar ngei pawhin Burma National Policy hi chu an tih danglam sak thei dawnlo tih kan hriat a tha ang. HEI VANGA HUALNGO HOIN BURMA-LUSHAI INTI THEILO AN NI ZAWK SI A.

    Facebook comments