• LUSEI/LUSAI INTIH HI HUAISEN VANG A NI THEI DAWN EM NI?

    That Savunga

    March, 2015 chhuak LENGZEM Chanchinbu phek 24-29 a Pu Vanneihtluanga thuziak TAHAN ZIN TURTE TAN tihkha ka lo chhiar ve a. Kha a thuziak phek 26-na, ZAWHNA ATTHLAK tih thupui ah khan, " Tahana kan unaute ID-ah chuan CHIN tih veka ziak a ngai. A huaisen falin '( Lusei / Lusai )' tih an belh ngam ṭawk. Hetiang khawpa Mizo nih a khirh chung pawh a Mizo ni ngamte hi ka chhuang ngawt mai. An dinhmunah hian ding ila, kan ' ram hmangtu' tam tak hian " Mizo ka ni " an tih ngam ka ring lo. Mahse khi lama Mizo lote hlei hlei he lama an rawn Mizo ṭhin hi chu a khawlh a ni," tih a hmang a. Hei hi ani ang milar takte ṭawngkam atan chuan a mawi chiah ang em le? Miin engtinnge min lo identified tih a thuziak tlawhchhanin ka'n chin pawr sak teh ang.

    "The words Kuki and Chin are thus synonymous and are both primarily used for many of the hill tribes in general. Therefore, the word Kuki-Chin was coined and employed by early researchers." G.A.Grierson, The Linguistic Survey of India. 1904,Vol.III, Part III, p.1,2,3, ( Calcutta: Gov’t. Printing Press,126 ),1904.

    Pu Vanneihtluanga hian Khawthlang lama Assam leh Bengali ten Kuki tiin min lo koh ṭhin tih chu a hre ve ngei ang a. Lushai Hills bika Kuki an lo tih ṭhin chu a hnuah Lushai ( Lusei tih an lam fiah thiam ve danin ) an lo hmang leh mai a ni tih pawh a hriat ngei ka ring. Ziak dang kan en pawhin hetiang hian kan hmu bawk;
    1." Those of the Kuki tribes which we designate as “ Chins ” do not recognize that name, which is said to be a Burmese corruption" B.S.Carey and H.N.Tuck, The Chin Hills, Vol. I. 1896,p.3
    2."Both the ‘ Kuki ’ and ‘ Chin ’ have been given to them by their neighbors. Neither of these terms employed by the tribes themselves." G.A.Grierson, The Linguistic Survey of India. Vol.I, Part I, p. 72.( Calcutta: Gov’t. Printing Press,126 )
    3."In the Burma Census Report of 1891, Chin ethnology is dismissed with the remark that the Chins or Kyins are a group of hill tribes, all talking various dialects of the same Tibeto-Burman speech, and calling themselves by various names." B.S.Carey and H.N.Tuck,The Chin Hills, Vol.I.1896,p-2,para.5

    Britishin Lushai Hills hi 1890-ah an ṭhut nghet ṭan a, Chin Hills chu 1892-ah an ṭhut nghet ṭan chauh a ni. Chi khat hnam khat kan ni tih min hriat chian avangin January 25-29, 1892 ah Calcutta-a Fort William ah Chin-Lushai Conference pawh an nei a, Rorelna pakhata min dah an lo tum tih chu Pu Vanneihtluanga hian a hmaa a la hriat ngai loh pawhin ZORO hmalakna zarah a hre ngei ang. Kha Chin-Lushai Conference aṭang khan THE CHIN HILLS REGULATION ( 1896 ) pawh a lo piang zawk a nih kha. The Chin Hills Regulation ah chuan engtinnge min lo dah tih i han keu leh teh ang. "2( 3 ) ' Chins' includes (a ) Lushais, ( b ) Kukis, ( c ) Burmans domiciled in the Chin Hills; and ( d ) any persons who have adopted customs and languages of the Chins and are habitually resident in the Chin Hills:" ( Regulation IV ), HILL POLITICS IN NORTH EAST INDIA, Shibankimkar Chauba, p.18, 1973, Orient Longman Ltd.

    1935-a The Gov't. of India Acts leh The Gov't. of Burma Acts dung zuia Burma chu British India aṭanga 'British Burma' ni tura an lo dah hran khan tuna Mizoram leh Chin State ramri ni hlen ta hi hmangin an lo ṭhen chhin a. Amaherawhchu he Acts leh a ramri chin hi British Parliament, House of Common thu passed a ni a, House of Lords lamin ṭhalo an tih avangin Buckingham Palace chuan March 3, 1936-ah khan Excluded Area Order leh Partially Excluded Area Order chu a lo chhuah leh ta a ni. Chutah chuan Chin-Kuki an tih zawng zawng chu Tribals min tia, kan ram pawh Tribal Area tiin Section 266, 311-ah min lo chhinchhiah bawk. Tribal tih hi HNAM MAWL tihna a ni loa, Thlah khat / Hnam khat, mi pakhat thlah pung darhte tihna a ni. " The Indigenous Zomi " Information & Public Relation Department, p-166

    Indopui II-na a lo tawp a, India leh Burma pawh an lo zalen dawn ta a. Chin-Lushai Conference a an thu passed pawh Indopui I-II avangin an puitlin hlei thei bawk si lo a, tuna kan ramri ang hian ramri chu ṭhen a lo ṭul tak tak dawn ta a. Lushai Hills lam chuan 1946-ah Mizo Union party dinin India Sorkar lailawk ah Memorandum an lo zu thehlut a. Chu an memorandum ah chuan heti hian an dah a. " Again, it was wrong that the word Lushai should be used as covering all the Mizo tribes since it is misrendering of the Lusei only a sub-tribe of the Mizo race. Hence though, perhaps, not originally intended, it has created a division.

    Only the word ' Mizo ' stands for the whole group of them all: Lusei, Hmar, Ralte, Paite, Zo, Darlawng, Kawm, Pawi, Thado, Chiru, Aimoul, Khawl, Tarau, Anal, Purum, Tikhup, Vaiphei, Lakher, Langrawng, Chawrai, Bawng, Baite, Mualthuam, Kaipen, Pangkhua, Tlanglau, Hrangkhawl, Bawmzo, Miria, Dawn, Kumi, Khiangte, Khiang, Pangte, Khawlhring, Chawngthu, Vanchiau, Chawhte, Ngente, Renthlei, Hnamte, Tlau, Pautu, Pawite, Vangchhia, Zawngte, Fanai etc.--all closely related to one another culturally, socially, economically and physically thus forming a distinct ethnical units."tiin.

    Chin Hills pawh February 12, 1947-a Union of Burma din tura Panglong Agreement an lo signed ve tawh avangin Arakan Hill Tracts ( Paletwa Bial ) nen inzawmin Chin Special Division ( UT-level ) tih a lo ni ve dawn ta a. Chin Special Division Acts-1948 chu an lo siam ve ta a, Chutah chuan Chin Hills Regulation-a mi behchhanin hetiang hian an lo siam ve ta a ni. "2 ( 4 ) ' Chin ' as including ( a ) Lushai, ( b ) Kuki, ( c ) Naga, ( d ) the Burmese consistently living in Chin Hills and ( e ) Chins living in adjoining areas." The Chin Special Division Acts. 1948, The Chin Chronicles p. 164. Hei vang hian Chin tih leh Mizo tih chu thuhmun niin Lusei / Lushai chu Chin / Mizo hnam peng ( CHI ) hming mai a ni tih a chiang hle ta a ni tih hetiang hian kan hmu bawk. " These Chin tribals ( called Mizos in India ) led an uninhabited existence till the end of the 19th century, when the British administrators undertook surveys and expeditions and demarcated boundaries ( 1935 ) for their administrative purposes dividing the same people into Mizo and Chins in India and Burma respectively." B.S.Carey and H.N.Tuck,The Chin Hills, Vol.I. Inner flapped.( 2nd para )
    Hengte kan en hian Lusei intih leh Lushai intih chu huaisen fal vang ni loin thil an hriat tlem vang mai zawk a ni. Mizoram ah Mizo Memorandum chu India Sorkar a lo inbun fel khan pawm a ni a, Lushai ai ah Mizo tih hman a lo ni ta a, Chin Special Division lam leh Lushai Hills pawn lam mite thurual-puina an lak loh avangin Burma chan Mizote chu Chin tia registered an ni reng zawk a ni.

    Chin inti duhlo Lusei inti tlat khi an huai vang a nih lohna dang pakhat han tarlang leh law law ila a fiah leh zual awm e. Burma Sorkarin a khualehtui dik taka a pawmte chu hnam ( nationalities ) riat-in a ṭhen a, chungte chu 1.Kachin, 2.Kayah, 3. Karen, 4. Chin, 5.Bamar ( Burmese ), 6.Mon, 7.Rakhaing leh 8.Shan tiin. Keini Mizote pawh Chin Comprises ( 53 ) ah min khung leng vek a, Meitei leh Naga pawh an khung nghe nghe. Hemi dung zui hian nikum 2014-a Census an neih pawh khan Code Number a pe vek zawka Chin Code chu 400 niin Chin hnahthlak zawng zawng 401-453 ah min khung leng vek a ni. Heng ethnics 8-a tello chu nationalized groups ah dah an ni; Gorkha, Chinese, Bengali etc. tiin.

    Sorkarin a khualehtuia a pawm ve reng Nagaho pawhin Chin-a dah loa a hrana dah an dil pawh pawmsak a ni lo, Chin nih an duh loh chuan a hla zawk ( an thisen zawmpui nilo ) Shan ah emaw, Mon ah emaw tal telh an ngai ang. Myanmar National Policy hi hrethiam lo an la tam hle a ni. India ah chuan Mizorama awm chu Mizo tih an ni mai a, Naga chu State hran nei an nih vangin Mizo kan ni lo, Naga kan ni an tih pawhin India Sorkar chuan a pawmsak mai. Burma ah chuan chutiang a ni velo tih chu kan han sawi tak aṭang hian a fiah tawh mai ang.
    Pu Vanneihtluanga ( Vanneitluanga ni zawk awm tak ) khan, " Khi lama Mizo lo te hlei hlei he lama an rawn Mizo ṭhin hi chu a khawlh a ni," tih ṭawngkam a hmang hi chuan. Mizo Memorandum pawh a kalh a ni. Mizo Memorandum khi han bih chiang leh deuh se, Mizorama awm aiin a pawna awm an tam zawk tih a hmu ngei ang. Ka ṭawng lo ngaihaw lo hram se, khi lama a unaute ngei pawhin Mizo chu an inti lo, a tlukpui Zomi an hmang zawk mai a nih khi.

    A chunga ka han tarlan tak "These Chin tribals ( called Mizos in India )" tih kha han ngaihtuah ṭha leh se ka duh khawp mai. Mizoram pawna awm hming dang vuah te hi Mizoram chhunga awmte aiin Mizo ah an chian zawk vanga rawn Mizo thei an ni. Mizoram aṭanga Tahan phai lo han bawh tute pawh khi Mizorama awmte ang bawkin Mizo ah an chiang bik bawk lo. An chian loh em emna chu Mizo Memorandum thehluh a nih hnu India Sorkar pawhin Mizo tih a pawm fel hnua Schedule Castes leh Schedule Tribes list ah Mizo Memorandumin Mizo a tih ve reng Hallam, Hmar, Kuki ( Paite-Thahdo etc.), Lusei, Mara leh Lai tiin a hran ṭheuha an lo dah leh si dan ah hian a lang reng mai. Mizo ah chuan lo chiang sela chuan Assama kan awm lai aṭang khan heng kan han tarlan tak Mizote hi a hrana dah loin Mizo tiin an lo khaikhawm daih tawh tur a ni.

    An hriat tlem vang ka han tihna chhan pawh Burma ah chuan he lam angin lehkhabu ro tling, kan hnam chanchin record leh lehkhabu hluite hmuh tur a tam ve lo. Tahan velah phei chuan mimal tute emaw chuan an lo kawl reng pawh a ni thei, mi nazawng hmuh tur a awmlo tluk a ni. A university thleng pha zingah pawh Duhlian ṭawnghmangho bik chu lehkha chhiar tlem ber leh taimalo ber kan ni hial ang. University Main Library ah pawh ka hmu ngai meuh lo. Kan Zomi unaute leh Lai ( Hakha ) lam unaute chu sawm rual rualin an ṭhu deuh chawt reng ṭhin. Class an neih loh ni phei chuan nileng lengin Lehkhabu unpui pui an keuin an note mawlh mawlh reng ṭhin a ni. Keini chu titi nuam, zaiho nuam, inkawm nuam ti kan nia, ṭhahnemngai taka lehkha chhiar ṭhin chu Kawl leh Vai an ni deuh ber zel. Keiniho zingah mahni zirlai pawh chhiar ṭha peih chu a tlem zawk kan ni, pawnlam lehkha chu han chhiar peih ziazang kan ni lo. Chuvangin mite hriat ang pawh kan hre pha ve lo reng a ni.

    Silchar Vaipa pakhatin, " Lushai aiah Mizo tih hmang loin Kuki tih lo hmang zawk se chuan Mizoram hi a zau khawp ang. Mizo tih hmanglo in unaute Kuki la inti an tam hle si a. Duh leh a hnuah pawh a thlak theih tho dawn a, Kuki Country tia an lo dah chin an neih theih hnuah hming chu a thlak theih tho dawn a, Calcutta pawh Kolkata an tih theih chuan," a tih hian awmzia a nei rilin a huam zau hle zawkin a lang. Kan insawi dan nilo mah se, Kuki tih leh Chin tih chu OFFICIAL RECORD a nia, Mizo tihin a huam chin let nga aia tlemlo a huam pha a ni. Kan inteite ta vek mai zawng a nih hi. Mizo emaw, Zo emaw hi keimahni insawi dan chu a ni mai thei e, mahse ram a hauh zau theih tlat loh. Kukiin a luah phak leh Chinin a luah phak ram erawh chu zau hem hawm tak a ni. Tun kan Assembly Session neih zawh tak ah khan Mizo Motion putluh pawm a nih thu kan lo hria a, kha Resolution passed tak kha Manipur, Nagaland leh North East State Assembly ah te thawn chhuah a ni em? Burma Sorkar laipui leh Chin State, Naga Special Region, Sagaing Region, Magwe Region, Arakan State ( Chin Affairs Ministry awmna ) ah te an thawn dawn em aw? Thawn ngei thei se ka va ti em!

    A chunga facts kan han tarlan tak aṭangte khian, kan awmna Sorkarte chuan Chin tih leh Kuki tia an lo record te hi hnam khat, thlah khat, tualṭawng ( dialects ) hrang hrang hmanga mahni ṭawng ṭheuha Chi hming invuah, common name ( nomenclature ) neilo kan nih an hre chiang zawk. Chuvanga Burma ah chuan Mizo tih hmang loa a tlukpui Chin hi lo hmang ṭhin leh Chin zingah Lusei pawh Code No 440-an lo pek chu ni. Burma ram pumpuia Chin an lo tih te khian Mizo tih hi an pawm thei chiah ang em? Mizoram Sorkarin a Mizotir thei ang em? NSCN hoin silai tin chunga an Naga tirte thin pawh a dam zawh ngang loh khi maw! Kan rambung ṭheuha sorkar lam palaite intawh khawmna SEMINAR ON CONSENSUS BUILDING neih phawt a, General Conference-in a bawhzui hna thawk tur ruat a, chumi zawha REFERRENDUM neih phawt a ngai ang. Chutilo chuan State pakhat ve mai thu chuan state dang leh region danga mite chu an kun mai hmel loh a, kan duh dan ngawt chu min ṭawmpui thei lo ang.

    Manipur State Sorkar chuan Kabaw Valleya an unau Meiteite hmasawnna tur lam tinzawnin Sagaing Division tan lamlian a sial ruah mai a, tunah Kawlphetha hnianghnara an hmuh theih dan tur a duang leh mek a. Mon-ywa, Kalay leh Tamu ah Damdawi In lian sak a tintuah leh mek niin kan lo hria a ni. Chutiang deuh chuan Mizoram Sorkar hian Chin State chhawmdawl hna hi kil tin aṭangin han thawk ve tawh zawng ni se, hmangaihtu, duhsaktute duh dan chu an zawmin an pawm thei mai thei. Mahse chutiang chu a ni thei rih si lo a. Chin State tana kan tih theih thil te ber, kan khawchhak kawng ( Aizawl-Champhai ) pawh kan thawm ṭha peih bawk si lo.

    Engtinnge Mizo inti ve tawh r'u chu kan tih theih ang le? India Ambassadorin " Lushai, Kuki, Nagate hi India khua leh tui an nia, lo thawn thla vek r'u " a tih pawh khan Prime Minister U Nua'n " Heng Lushai, Kuki, Naga te hi heta ṭanga rawn chhuk Chin vek an ni asin! Nangin enge i hriat?" a ti a, Indian Ambassador chu a dang reng zawk a ni. A nihna tak ah chuan Pu L. Keivoma Mizo Identity leh Mizorama mite Mizodan hi chu a la inzau hleih hle a ni. Langkaih, Vairengte, Ṭiau, Karnaphuli pello MIZO nih hi a himlo ber zawk ang. Tupawhin Mizo ka ni an tih chuan, ṭha taka lo WELCOME mai hi Mizo nih vek duhtu chuan an tih mai tur a niin kei chuan ka hria. Israel thlah ka ni inti Ethiopian midum ho pawh Israel Sorkar chuan an ramah thlawhnain a phurlut zut zut thei a, khi lama Mizolote he lama an rawn Mizo theihna chhan pawh Mizo Memorandum, Mizo Hnama an chian zawk vang a ni, a khawlh lul lo e.

    Tin, March 1, 1955- Champhai Border Meet neih ṭuma Aizawl D.C. Iyer leh Falam D.C. Pu Thawng Cin Thang-te inkawmna thukhawchang hi i han thai lang leh hram teh ang. Iyer chuan, " Helam aṭanga rawn chho sipai te, lo pem chho leh lo zin chho ho khi rawn thawn thla vek ula a ṭha ang," a ti a ni awm a. Pu Thawng Cin Thanga chuan, " Sipai chu keini lak an ni loa, Burma Sorkar lak a ni a, kan rawn thawn thei lo ang. Lo pem leh lo zin chho ho pawh kan unaute an ni a, unau chu sawi loh hnam dang mikhual pawh kan hnar ve ngai lo. An duh leh awm se, an duh leh haw se, anmahni thu thu a ni,"tiin a chhang a, Aizawl D.C. chuan, " Chutia nih chuan kan thu pass sate chu inbawhchhe zel dawn a ni maw?" a tih phah hial a ni. Pu Thawnga chuan, " Thu pass chu Dan angin a kal ang chu. Thisen erawh chu Dan chungah a leng tur alawm," a ti. Kha vang khan hun rei tak chhung chu RAMRI KAN PHALNA LEHKHA keng loin Mizorama mi te chuan an fate Burma Sipaia ṭangte kan / tlawhin Thailand hnaih Daway, Beik leh Moulmein thleng thlenga lo zu kal pawh an kat nuk a nih kha. An ute hnena zin pasal neia awm hlen ve ta mai Mizoram nula pawh an tlemlo hle a ni lo'm ni kha?

    Kan Bible-ah pawh " In thinlung a tharin lo danglam tawh zawk rawh se," a tih kha kan hnam inpumkhatna, zai khata kan uaizana atan chuan a thara kan danglam a ngai a ni ber zawk niin a lang a ni. Sessiona han chai tak mai vang te, Lamkaa Chin-Lushai Conference Cham hmanna tumsak mai avang ngawt tea LAWMTHU sawi hi chu a la hun lo. Thu maia tih ai chuan thiltiha lantir uar ni zawk thei se a duhawm hle ang. Ṭhenkhatin Mizo hi upa viauin kan hria a ni mai thei, officiala hmanna upa kan la hre lo. Chin tih leh Kuki tih erawh chu min lo awp tawh tute min lo recognized dan a ni. Hei hi kan pawm tlan theih vek chuan Mizo pawh min pawmpui vek thei ang. Duh bik leh duh loh bik neih hi a hnamchawm zia zawk a ni. Hnampui bera kan ngaih English ho pawh Sap kan ti a, an haw chuang lo a, Chin Hills lamin Mirang an tia, an haw bawk hek lo. An awpram ten hming hran hranin kan vuah chu an chhuang zaw mah emaw tih turin lungawi takin an pawm mai a nih hi maw.

    Chanchin Ṭha avangin kan unaute aiin miin changkang zawka min hmuh leh min ngaih hi a lawmawm rualin mahni Unaute hmuhsit nana hmang duh kan awm ṭhin hi sim a hun hle tawh a ni. Sorkar registered hming meuh pawh ṭawmpui duh loa hming hran phuah tur hre bawk silo, mahni pianna thlahtute hming hluihlawna mi hming lo ṭawm ve ngawt hi an huaisen fal vang chu a ni theilo hrim hrim ang. Aruh lang rawta thu ziak ka chin chhan ber chu ṭawngkam lawmawm leh thluai thlum man thiamlo hi chhiartute zingah a tam zawk an ni fo a, thu pehhel vak loa tlang taka ziak hi a mi den na deuh angin lang mah se, hriatfiah a awl zawk a, mi tam tak inhriatfiah nan a ṭangkai duh zawk foin ka hria a ni. A chhan bulpui ber chu kan hnam inpumkhatna atan ṭhahnem kan ngaih vang zawk a ni ber mai. Vawi khat pawh ZoRO puipate Treasurer Pu Zalianchhunga ( L ) te ina kan ṭhutkhawm ṭumin member pakhatin 'Chin chu Kawl hoin an hmusit, Lushai chu an ngaisang' a ti a, ka khak nghal mai, " Mahni unaute min hmuhsit sak chu a chhuanawm viau em ni? An thlavang hauh zawk tur alawm, Hetiang a nihin engtinnge Zo hnahtlakte kan insuihkhawm theih tehlul ang?" tiin.
    Engle khaw le, thil hluite chu an ral zel a, thil thar a lo chhuak zel dawn a. Zofate kan inpumkhatna daltu keimahnia…….bet tlat hi kan paih theiha kan inchhawmdawl tawn chuan kan la insuihkhawm ve ngei ang. INSUIHKHAWMLO HNAM DINGCHHUAK AN AWM NGAI SI LO A.

    source The Aizawl Post (April 24-2015)

    Facebook comments