• MITNA HRI

    Tunlaiin Mizoram leh India ram hmun dangah mit na hri a leng nasa a. Mipuite kan inven leh inenkawl theih nan mit na hri lo lan chhuah dan, a inven dan leh inenkawl dan tur tlem i han tarlang teh ang.

    Mit mu var lai tuamtu hamda (conjunctiva) a lo nat hian conjunctivitis kan ti a. Mitna hrik chi hrang hrang (bacteria, virus) leh allergy vangin a na tlang pui. Tunlaia
    leng hi Bacteria vang a ni ber.


    A lo lan chhuah dan:-
    Insawisel dan (Symptoms)
    • Mit men a nuam lo.
    • Bawlhhlawh lut angin a kam ṭhum ṭhin.
    • Engah men a har.
    • Mit ek a tam.
    • Mit a inchar ṭhin.
    • Khawhmuh a fiah lo ruai ṭhin.
    • A chang chuan electric bulb enin chhimbal zam an hmu ṭhin.
    • Khawsik er er leh mitmu nâ a awm ve thei.


    Ena a lan dan (signs):-
    • Mit mu var tuamtu a lo sen vek a.
    • A chang chuan mit hamdaah thi a put ṭhin.
    • Mit han keuin mit tlangkawm chhunglamah mit ek a awm ṭhin.
    • Mit hmul a inchar ṭhin.


    A nat hun chhung
    A nat tirh aṭangin ni 3 - ni 4 a na zual hle. Enkawl loh chuan a benvawn ṭhin. Enkawl chuan ni 10 - 15 ah a dam tlangpui.


    A kaihhnawih natna
    • Mit darthlalang (cornea) a ti p^n thei (marginal corneal ulcer)
    • Mit darthlalang pum a tina thei (superficial keratitis).
    • Mit tui luan thlakna ip a tipun thei (dacryocystitis).


    Enkawl dan
    • Antibiotics mit thlawr leh hmeh chhuah (drops & ointments). A nat dan a zirin a thlawr zin dan a inang lo. Antiobiotics eye drops hi Chloramphenicol Gentamycin, Ciprofloxacin, Ofloxacin, Tobramycin, Gatifloxacin, Levofloxacin, Moxifloxacin leh Besifloxacin a hman theih. Amaherawhchu, doctor (eye specialist) rawna an thurawn anga hman a him ber. Men chhung zawng mitthlawr hi thlawr a, mut hlanin hmeh chhuah hnawih tur a ni.
    • Tui chhuanso dah vawh (lum pip pep) a chi alin nitin vawi hnih sil tur. Sil zin lutuk chu a ṭha lo. Mittuiah hian natna hrik that theitu a awm a, sil nasat chuan chu chu sil bo vek a hlauhawm.
    • Tarmit dum (dark goggles) vuah tur.
    • Mit tuam loh tur.
    • Steroids hman loh tur. (Betnasole-N) tih ang chi hi a tirah hman miah loh tur a ni. Na a tipunlunin harsatna dang mit delna thlengin a thlen thei.
    • Na chhawkna (e.g Ibuprofen and Paracetamol) ni 2-3 vel ei tel theih.


    In ven dan
    (1) Hmai nitin vawi 3 tal phih ziah tur.
    (2) Kut fai taka sil tur, minute 2 chhung tal sahbawn nuaia tui luanglai (running water) a sil tur a ni.
    (3) Towel leh rawmawl inhman ṭawm loh tur.
    (4) Mutho loh a ṭha.
    (5) Mit na hri vei mit thlawr saktu phei chuan kut fai taka sil ziah tur.
    (6) Thli thawah awm loh tur.
    (7) T.V, Computer leh Mobile phone lakah invent tur (en leh hman tam loh tur).
    (8) Zan men rei loh tur.
    (9) Mit a nawm loh veleh mit lam thiam doctor rawn vat a, an thurawn zawm ṭhat tur.
    (10) Inenkawl vat pawha ni 10 chhunga a dam loh chuan doctor rawn leh ngei ngei tur.




    Dr Lalhuthangi Hmar
    Eye Specialist
    Civil Hospital, Aizawl

    Facebook comments



  • Recent Forum Posts
    Admin

    Mizo Keyboard

    A lawmawm tak tak a ni, hlutpuitu pahnih khat neih pawh hi min tiphurtu leh man lova hun sen huamtu min nih tîrtu a ni fo ṭhin. Kan lawm e. Zawhna

    Admin 02-21-2017, 09:56 PM Go to last post
    Franz Reuben

    Mizo Keyboard

    Mizo keyboard kha tha ka ti hle mai a, ka rilrua zawhna lo lang nghal chu, kha kha webpage lamah a hman theih ang em, web browser hian a hmelhriat dawn

    Franz Reuben 02-19-2017, 10:06 PM Go to last post