• IS firfiakte'n American journalist lu an tansak leh

    Islamic State (IS) firfiakte chuan American journalist Steven Sotloff-a lu an tansakna video an tihchhuak leh a, hei hi US-in IS firfiakte laka thlawhtheihna hmanga beihpui a thlak avanga phuba an lakna a nih thu an sawi.

    IS hian August 19 khan American journalist, James Foley-a an thahna video an lo tichhuak tawh a, hetah hian US sorkarin an vauna a zawm lo a nih chuan an mi hren mek, Steven Sotloff hi an that leh dawn tiin an sawi a ni. Video an tihchhuah tharah hian firfiakte chuan an vauna thu an tihchhuah chu an ti mai mai lo tih lantirna atan an hmang nia rin a ni.
    Hetihlai hian US chuan Iraq hmarlamah IS firfiakte hi thlawhtheihna hmangin a la beih chhunzawm reng a, US Central command chuan ISIL motor 16 chu Mosul bulah an kahchhiatsak niin a sawi.
    US President Barack Obama pawhin Iraq khawpui, Baghdad-a America hmun pawimawh leh staff-te venghim tura sipai 350 thawnluhna tur thupek a tichhuak tawh bawk a ni.
    August 19 khan IS hian American journalist James Foley-a lu an tansakna video chu an lo tichhuak tawh a, he video-a lang, firfiak pakhat hmaituam, British accent hmang chuan US President Obama chu a sipaite IS firfiakte beih tir tawh lo tura vauin, an thu a zawm lo a nih chuan an mi hren dang, Steven Sotloff an that leh dawn niin a lo sawi tawh a ni.
    Video an tihchhuah tharah hian British accent hmangtu firfiak bawk kha Steven Sotloff bulah a lang leh a, Sotloff hi James Foley ang bawk khan jumpsuit hak tirin a ṭhingṭhi a ni. Foley an tih ang bawkin Sotloff pawh hi a thusawi tur an duansak leh a, Syria rama US inrawlhna man a pek a ngai ta tiin a sawi.
    Firfiak hmaituam lang ve chuan Iraq-a firfiakte laka US in beihpui a thlak a demna thu a sawi hnuah, journalist lu hi a tansak ta a ni. IS firfiak chuan US President Obama chu vauin, Islamic State laka a foreign policy te, thlawhtheihna hmanga bomb an thlak chhunzawm zel avangte'n a mite chu an thahsak chhunzawm zel tur thu a sawi. Sorkar dang, Islamic State firfiakte beihna tura America thawhpuitute pawh inthiarfihlim turin a vau nghal bawk.
    Hemi hnu hian firfiak hian an mi hren zinga mi, British mi David Haines chu thahah a vau zui leh bawk. David Haines hi British sipai hlui niin, chhawmdawlna hna thawktu pawlah a tel a ni.
    US State Department thupuangtu, Jen Psaki chuan video chu a tak a ni em tih an la hriatchian loh thu a sawi a, a tak a lo nih chuan firfiakte rawng taka chetna chuan a tithinur hle tih sawiin, Sotloff-a chhungte a tuarpui thu a sawi nghal bawk. UK Prime Minister David Cameroon pawhin firfiakte chetdan leh an mi hrente rawng taka an that chu a dem thu a twitter-ah a tarlang bawk.
    Kum 31 mi, Steven Sotloff hi freelance journalist niin, kum 2013 khan Syria-a a awm laiin man a ni.

    post by Cross Mawia Hualngo

    Facebook comments