• UEFA Best Player in Europe - Cristiano

    2014 UEFA Champions Lea*gue-a Real Madrid champion puitu Cristiano Ronaldo chu football journalist te'n 2013/14 UEFA Best Player in Europe-ah an thlang.
    Ronaldo chuan, "Ka lawm takzet a, a bik takin ka teammate-te chungah lawmthu ka sawi duh. Anni tel lo chuan mimal chawimawina hi ka dawng thei lo," tiin a khelhpuite pawimawhna a theihngilh lo.

    Kum 29-a upa Ronaldo hian Real Madrid-in seasom liam taa Champions League vawi 10 an champion-na kawngah goal 17 a khung a, hei hi record a ni. Spanish club tan hian inelna hrang hrangah goal 51 a khung tawh a, Copa del Rey-ah a champion pui bakah La Liga-ah pathumna a nih pui bawk. Hei bakah hian Portugal captain hian an ramin 2014 World Cup an khelh theih nan playoff-ah Sweden lamah hattrick a siam bawk.
    Manchester United player hlui Ronaldo chuan, "Champions League vawi 10-na atana a champion kha hun rei tak chhung Real Madrid lo tum tawh a nih avangin a nawm dan a dang bik a, Madrid player nih chuan champions League title lak hi kan mawhphurhna a ni. Champions League, Spanish Cup leh Uefa Super Cup kan champion avangin season ṭha takah ka ngai a, tun season-ah Champions League, Cup leh League bakah champion theihna zawng zawnga champion hi kan tum a ni," tiin a club chu result ṭha zawk neih pui a tum thu a sawi.
    UEFA Best Player in Europe Award chu
    Europe-a football-a thuneitu sang ber UEFA-in kum 1956 aṭanga 1999 thlengin player ṭha ber hnenah European Footballer of the Year award (Ballon d'Or) an sem ṭhin a, amaherawhchu 2010 aṭangin FIFA World Player of the Year leh European Footballer of the Year award (Ballon d'Or) an belhbawm a, award thar a piang a, chu chu FIFA Ballon d'Or tih a ni.
    UEFA chuan European Footballer of the Year award zul zuiin kum 2011 aṭang khan Europe chhunga inkhelte tan award an siam a, a hmingah UEFA Best Player in Europe Award tih a ni.
    Award sem ṭan kumin Barcelona forward Lionel Messi-a'n a dawng a, kum 2012-ah a teammate Andres Iniesta-a'n a dawng ve leh a, kum 2013-ah Bayern Munich treble cup champion puitu Frank Ribery-a'n a dawng ve leh. Ronaldo hi he chawimawina dawng thei palina a ni ta a ni.
    Engtin nge an thlan?
    Europe-a footballer ṭha ber thlangtu hi football journalist-te an ni. Journalist pakhat zelin 2013/14 season-a che ṭha an tih player panga ṭha an tih dan indawtin an thlang a, an ziah hmasak berin point 5 hmuin, pahnihnain point 4, pathumnain point 3, palinain point 2, panganain point 1 an hmu.
    Player 35-in journalist-te vote an hmu a, July 17 khan UEFA chuan vote hmu thei player 35 bakah award dawng thei tur player 10 a tarchhuak. August 14 khan Best Player in Europe dawng thei tur chu player pathumah an titlem a, chung player-te chu Manuel Neuer, Arjen Robben leh Cristiano Ronaldo te an ni.
    Ningani zan khan Grimaldi Forum, Monaco-ah Award semna ceremony neih a ni a, he hunah hian journalist 54 te'n electronic system hmangin a sang pathum aṭangin lawmman dawng tur an thlang a, Ronaldo-a'n Germany World Cup champion keeper Neuer leh Bayern tana goal 21 khungtu Robben te aia vote hmu sangin Award hi a dawng ta a ni.
    Top 10-a lang pha player dangte chu : 4. Thomas Muller (Bayern Munich, Germany); 5.= Philipp Lahm (Bayern Munich, Germany), 5.= Lionel Messi (Barcelona, Argentina); 7. James Rodriguez (Monaco/Real Madrid, Colombia); 8. Luis Suarez (Liverpool/Barcelona, Uruguay); 9. Angel Di Maria (Real Madrid/Manchester United, Argentina); 10. Diego Costa (Atletico Madrid/Chelsea, Spain) te an ni.

    posted by Cross Mawia Hualngo

    Facebook comments